AGENDRE BA WEMAOSO YESU (PASKAH I)

Minggu, 12 April 2020, Bözi 10, Nifalua ba Nomo Mbanua Niha Keriso

1. Fangowai

Sondr. Agendre Sato Sondr Sato

: : : :

Ya’ita si sambua fongambatö, owulo ita faondra ba gosali andre, awö mbanua niha Keriso sato sowulo ba nomora zamösana, börö wa’owuawua dödö, me no maoso Zo’aya ya’ita Yesu Keriso moroi ba ngai zi mate. Andrö, ba döi Yesu ma’owai ami: “No maoso Keriso”! Duhu no Maoso Keriso! Ya faofao khömi Lowalangi, Yafao khöu GehehaNia.

2. Manunõ: BZ 107: 1-2, No Maoso Yesu ba no Möna

1	No auri Yesu ba no möna, fa’abu dödö no awai. Tasuno Ia samatörö, ba sangorifi fefu soi. mo’arota wangöhöli, ba zi sandrohu fekoli.
2	No maoso Yesu ba no möna, lagö lewatö tebokai. Te’ala wa’abölö horö, Ifa’aso wamohouni. Si no göna fangelifi, oi  Ikaoni ba wa’auri.

3. Votum

Sondr Sato

: :

Da tafohohou wa’aurida andre ma’afefu ba wa ha sambua khõ Zo’aya, muzizio ita fefu; No owulo ita ba da’e, ba dõi Lowalangi Ama, ba dõi Nono-Nia Yesu Keriso, ba ba dõi Geheha Ni’amoni’õ. Fangorifida ha ba dõi Yehowa sombõi banua si yaŵa awõ danõ. Yaduhu Mudadao zato

4. Fombaso Taroma Li Lowalangi: Sinuno 68:25-36

25	No lõ laʼila, me õtõrõ, yaʼugõ Lowalangi, me itõrõ Lowalangigu andrõ, razogu, weʼamõi ba niʼamoniʼõ andrõ.
26	Mowaõwaõ, zanunõ, ba itete, ba solau biola, ba hunõ nono alawe, samõzi faritia.
27	Misuno Lowalangi, Soʼaya, ba gowuloa andrõ; yaʼami si oroi gumbu Ndraono Gizeraeli andrõ!
28	So ba daʼõ Mbeniyami, si akhi andrõ, samatõrõ, ba salawa Ndraono Yuda, sato andrõ khõra, ba salawa Ndraono Zebuloni ba salawa Ndraono Nafetali.
29	No iʼoroiʼõ Lowalangi waʼasalawau. He Lowalangi, aʼaroʼõ nifaʼemau khõma!
30	Bõrõ gosalimõ andrõ, ba Yeruzalema, wa laʼohe zumange khõu razo.
31	Tenawa zaliwaliwa andrõ, barõ zukhu, awõ ngawawa zawi si mantua andrõ, awõ nono zawi niha baero, enaʼõ mangalulu ira, wolohe boto wirõ. Fazawili soi andrõ, somasi manuwõ.
32	So dania razo Miserayi; iʼaliogõ iʼoroʼõ dangania khõ Lowalangi tanõ Gaitiofia andrõ.
33	Yaʼami õri niha ba guli danõ, misuno Lowalangi, misuno Zoʼaya!
34	Misuno zanõrõ banua fondrege si yawa andrõ, si no gõtõgõtõ faʼara; hiza, ifarongogõ linia andrõ, li sabõlõ.
35	Mitehe khõ Lowalangi waʼabõlõ; famatõrõ Iraono Gizeraeli waʼasalawania andrõ ba famatõrõ banua si yawa waʼabõlõnia.
36	Sataʼu ita nilau Lowalangi, moroi ba niʼamoniʼõ andrõ khõnia; Lowalangi Ndraono Gizeraeli andrõ zameʼe faʼabõlõ ba faʼabeʼe ba mbanuania. Nisuno Lowalangi!

5. Fangandrõ Wangefa Horö, Muzizio ita fefu...........

Mangandrõ ita:

He So’aya ya’aga Yesu Keriso si mate ba röfa ba hili Gologata, ba si no maoso moroi ba ngai zi mate. Faduhu dödöma ba daroma Li-Mö me Õwa’ö: “Ya’odo wemaoso ba fa’auri, samati khõ-Gu, ba auri, heŵa’ae mate ia.” Ba hiza, ba lala wa’aurima sero ma’ökhö asese ma’ositengagö ba ma osilö’ögö Ndra’ugö So’aya, me ma’o’ö nifakhoi dödöma samösa. Bologö dödö-U khöma, ba be’e aefa khöma horöma andrö. Hakhösi dödö-U khöma So’aya, böi tehe tekiko, törö tödö-U wa’ebua dödö-U ba fa’ahakhö dödö-U khöma. Böi faefa ndra’aga moroi ba wa’omasi ba ba wangorifi andrö si no öhönagö ba zamati khö-U. Hakhösi dödöU khöma, Ama, ba be’e aefa khöma horöma andrö ma’afefu.......Yaduhu.

Manuno: 90:1, “He Niha Gulidanö”

1	He niha gulidanö, böi zi lö tatöngöni Keriso ba röfa. No I’aohasi ’ölö wanaögö fango’aya, heẅa’ae Razo sebua.

Turia wangefa horõ:

“Da’ö duho ba niwa’ö andrö: No so khöda gere sebua si manö, si no dumadao ba gambölö daroma wa’asalawa andrö, ba zorugo. Andrö göi I’ila Ifo’ahonoa wangorifi sangondrasi Lowalangi, nifa’ema-Nia, me no si lö mamalömalö fa’auri, ba wolului khöra fanguma’ö.” Yaduhu.

(Mudadao zato)

6. Manunö BZ 113:1-2, No Ifuli Auri  Yesu

1	No Ifuli auri Yesu, ni susugi Yehowa. Oi te’ala zaradadu, somba’agö femöna. Oi mudögö gulidanö, me möi tou mala’ika. Si möi mamokai lewatö, ba nibe’e So’aya.
2	No ifuli auri Ia, oi  tobali dödöra. No oroma mege khöra, me alele ba röfa. No Ilaẅa wa’amate, ba no möna Zo’aya. Tandra Ia si föföna, nisusugi Yehowa.

7. Fombaso Waöwaö Wemaoso Yesu: Mareko 16:1-8

1	Ba me no aefa luo sabato, ba laʼõli daludalu ira Maria, banua Magadala ba Maria, ina Yakobo andrõ, ba Salome andrõ, enaʼõ mõi ira mombayoini yaʼia.
2	Ba ahulõ sibai, me luo migu, mõi ira ba lewatõ, me tumbu luo.
3	Ba faoma lamane khõ nawõra: Ha niha zamagaõlõ khõda gowe andrõ, wangeheta yaʼia ba mbawa lewatõ?
4	Ba me lafaigi, ba laʼila, no mufagaõlõ gowe andrõ; ebua sibai sa.
5	Ba mõi ira ba lewatõ, ba laʼila nono matua, samõsa, sidadao ba gambõlõ, sobaru sanau, safusi; ba tokea ira.
6	Ba imane khõra: Bõi tokea ami. Yesu, banua Nazareta andrõ niʼaluimi, niforõfa andrõ; no maoso ia, lõ yaʼia ba daʼe; hiza naha, ba nibeʼera yaʼia.
7	Ba miʼaeʼe miwaʼõ ba nifahaõnia ba khõ Wetero andrõ, mowaõwaõ ia fõnami, weʼamõi ba Galilaia; ba daʼõ miʼila ia dania, itõrõ dania niwaʼõnia khõmi.
8	Ba mõi ira yawa, fulõi ira, wondrõi lewatõ; noa sa manizinizi ira ba no tobali dõdõra; ba lõ hedehedera, me ataʼu ira.

8. Manunö: Buku Zinuno 261:1 + 6 (Te’owuloi wasömbata)

1	Ya’e zumange fasömbata. Ma’ohe sumange Yehowa. Reff: Ma’andrö khö-U fahowu’ö. Zumange ni’ohema khö-Mö
6	Ya’e zumange fasömbata. Ma’aohasi gölö Zo’aya. Reff:..................

9. Manunö: Buku Zinunö 112:1-2 “Böi Aefa’aefa Ba Dödöda”

1	Böi aefa’aefa ba dödöda, me mate Yesu ba röfa. Börö fefu golalöẅada, wa no teforöfa Ia. DoNia wanasa horöda, afu te’orifi ita. Solohe ya’ita khö Nama, ba naha so’ahonoa.
2	He no fondrege wa’afökhö, nitaögö Yesu ba röfa. Lö tewu’a niẅa’ö-Nia, wangomasi’ö Ya’ita. Da’ö wa I’andrö khö Nama, “Be’ aefa khöra horöra. Me lö aboto ba dödöra, me lö la’ila nilaura.

10. Angerõnua: Mataio 28:1-10

1	Ba ba zi bongi, me no aefa luo sabato, me arakha moluo luo migu, ba mõi Maria andrõ, banua Magadala, awõ Maria si sambua andrõ, mamaigi lewatõ.
2	Ba hiza ziheu sabõlõbõlõ. No mõi tou malaʼika Zoʼaya, moroi ba zorugo, mõi ia mameta gowe andrõ, ba idadaoni.
3	Ba hulõ gari mbanua wamaigira yaʼia, ba barunia, ba no afusi, hulõ mbetua
4	Ba manizinizi zanaro andrõ, faʼataʼura ia bo tobali hulõ zi mate ira.
5	Ba humede malaʼika andrõ, imane ba ndra alawe andrõ: Bõi miʼataʼufi! uʼila sa, miʼalui Yesu andrõ, niforõfa.
6	Lõ yaʼia ba daʼe; noa sa maoso ia, itõrõ niwaʼõnia; miʼae mifaigi naha andrõ, ba zi so ia mege.
7	Ba mitaʼitaʼi, miʼae miwaʼõ khõ ndra nifahaõnia, wa no maoso ia moria ba ngai zi mate, ba hiza, mowaõwaõ ia ba Galilaia, ba daʼõ miʼila ia dania.
8	Hiza, no uwaʼõ khõmi. Ba laʼaiioʼõ ira, larõi lewatõ, ataʼu ira, ba omuso sibai dõdõra, fagohi ira, ba wangombakha ba nifahaõnia.
9	Ba hiza, falukha ira Yesu, ba imane khõra: Yaʼami! Ba laʼondrasi ia, laraʼu gahenia, latuhi danõ fõnania.
10	Ba imane khõra Yesu: Bõi miʼataʼufi, miʼae miwaʼõ ba dalifusõgu, enaʼõ mõi ira ba Galilaia, ba ba daʼõ laʼilado dania.

FA’ABÖLÖ WEMAOSO YESU Matai’o 28:1-10 Ya’ami ira talifusӧ ndroto-ndroto Mbanua Niha Keriso ni’omasi’ӧ ba ni’amoni’ӧ Keriso Yesu.  Ma’owai ami fefu ba dӧi Zo’aya yaita Yesu Keriso, Shalom.  Eben Haezer :  irugi da’e no itolo ita Lowalangi.  Ha bӧrӧ wa’ahakhӧ dӧdӧ ba fa’omasi Lowalangi watola auri ita ba mohanu-hanu irege tola ta’ohalӧwӧgӧigӧ halӧwӧda ba nomoda zamӧsana, hewa’ae irugi da’e no ifasui ita wabah virus corona samatumbu’ӧ ba dӧdӧda fangiwa dӧdӧ, fanizi-nizi dӧdӧ, fa’atofera gera-era ba no ato zangarӧ-ngarӧ, ba wa’atosasa ba da’ӧ. Ihawui fa’atau, ba fa’aombӧ dӧdӧ, ba wanohugӧ fa’auri ba gulidanӧ andre. Mendrua manӧ me tetohugӧ la dou’ӧ ginӧtӧ wa’atorӧi ba nomo. Ba hewisa wangalui soguna ni’oguna’ӧ soguna ba mboto sero ma’ӧkhӧ ?. Noro dodo, famakao, fӧkho, bawa lofo, folohi tenga ha ba gӧtӧ ia’da’e alua, mefӧna gӧi alua. Hadia ba hewisa ita ba wamondragӧ ngawalӧ noro dӧdӧ soya ngawalӧ silӧ tola lӧ alua. No ifabu’u Yesu ba zamati khӧ Nia walӧ ibӧhӧi dana khӧnia  sangomasi’ӧ Yaia. Yohanes 14:18” lӧ urӧi ami hulӧ si lӧ ama si lӧ ina, mӧido khӧmi”. Faudu ba daroma li Lowalangi ma’ӧkhӧ ba wanӧrӧ tӧdӧ femaoso Yesu Keriso moroi ba ngai zimate. Hadia ba hewisa zifalukha Maria Magadala awӧ Maria tanӧ bӧ’ӧ me mӧi ira ba lewatӧ ba wamaigi mboto Yesu ? 1. Ihawui ira fa’ata’u ayati 5-6 ba humede Malaika andrӧ : Boi mi’ata’ufi u’ila sa, mi’alui Yesu andrӧ niforӧfa. Lӧ Yaia ba da’e, noa sa maoso Ia. Maria ba ira awӧnia ata’u  meno tebokai lewatӧ ba lӧ la’ila mboto Yesu. Ata’u ira melӧ aboto ba dӧdӧra wemaoso Yesu ba ngaluo sitӧlu hewa’ae no iwa’ӧ khӧra Yesu fatua so Ia ba gulidanӧ wa lӧ tola lӧ’ӧ itӧrӧ wamakao ba fa’amate, ba maoso ia ba ngaluo sitӧlu. Olifu ira hadia zino i’oroi’ӧ Yesu ba la’aohasi ba dӧdӧ. Da’e zoambӧta ira alio olifu hadia nirongora ba lӧ la tanӧ ba dӧdӧ  zino i’oroi’ӧ khӧra Yesu. 2. Famatenge ba wangombakha no maoso Yesu ayati 7-8. Ba muhede Malaika: Miae’e mi ombakha’ӧ khӧ ndra talifusӧ Nia wa no maoso Yesu moroi ba ngai zimate. Ba la’alio’ӧ ira larӧi lewatӧ ba hiza falukha ira Yesu ba imane khӧra Ya’ami ! ba laondrasi Ia, lara’u gaheNia, latuhi danӧ fӧnaNia. Aboto ba dӧdӧra wa duhu no maoso Yesu ba ba wa’omuso dӧdӧra fagohi ira ba wangombakha khӧ ndra nifahaӧ Yesu. 3.  Femaoso Yesu no fa’abӧlӧ Lowalangi Ama ba Zorugo, ba ba wangoroma’ӧ faomasi Nia ba niha gulidanӧ ba no ifabu’u liNia watohare Ia ba wamondragӧ zamati khoNia. Ibe’e  wanӧtӧna ba fa’abӧlӧ sibohou ba khӧ ndra nifaha’ӧ Nia, taya wa’ata’u ba ihawui ira fa’omuso dӧdӧ. Femaoso Yesu ibe’e wa’aro dӧdӧ ba zamati khӧNia ba tehӧnagӧ/tefabu’u so wemaoso ba fa’auri silӧ aetu ba zangomasi’ӧ Yaia. Femaoso Yesu ba so Ia ba gotalua zamati khӧNia, fao Ia awӧda ba wamakao, ba wangosambuaӧ dӧdӧ, ba wolohe famohouni, ba wamaeri, ba ba wanga’aro’ӧ tӧdӧ, era-era ba wa maondragӧ ngawalӧ gameta’uӧ sata’u ita ba sanizi-nizi dӧdӧda, samangiwa tӧdӧda mendrua manӧ ba ginӧtӧ andre ba wa’abӧlӧ virus corona sanӧrӧi ulidanӧ. Tenga ha yaita sorasoi ngawalӧ gameta’u’ӧ, lӧ irӧi ita fao Ia khӧda sanolo ba sangorifi yaita. Bӧi ata’u ita, ya’aro dӧtӧnafӧda khӧ Yesu Keriso sino mӧna, sino maoso moroi ba lewatӧ. Fa’abӧlӧ Yesu andrӧ da’ӧ wangabӧlӧda ba wangohalӧwӧgӧigӧ halӧwӧda, ba sangabӧlӧ’ӧ yaita ba wanimba ngawalӧ wa’abӧlӧ gafӧkha samaelungu. Femaoso Yesu da’ӧ zame’e khӧda femӧna ba ngawalӧ nudu sanaisi yaita ba wangai halӧwӧ Zo’aya ba ba wolo’ӧ oroisaNia. Ikaoni zamati khӧNia ba wanuriaigӧ ba niha silӧ fanӧtӧna, sangerogӧ Lowalangi. Ikaoni ba ifatenge  ita ba wanga’i halӧwӧ fanuriaigӧ duhu no maoso Yesu solohe fangorifi ba niha so wanua ba gulidanӧ. Ikaoni ita ena’ӧ tobali howu-howu ba niha fefu. Tatanö ba dödöda nitanö ba dödö moroi ba zura 1Fetero 1:9 “Me misöndra wozu wamatimi andrö, fangorifi nosomi andrö. Yaduhu.

Manunö: BZ. 156:1, “He So’aya, Böi Bulö’ö”

1	He So’aya, böi bulö’ö, khögu daroma liMö. Ufonaha ba dödögu, me no haregu da’ö. Ba da’ö sa manandrösa, wa nötöna dödögu. Lö moguna danö bö’ö, liMö wangorifigu.

11. Tuho wamati

Me no tarongo daroma Li Lowalangi, ba da tafaogö lida wamaduhu’ö famatida ya’ita niha Keriso fõna Lowalangi, muzizio ita fefu........ endronga lida:....

Ya’o mamati khö Lowalangi Ama si lö ambö fa’abölö, somböi banua si yaẅa awö danö. Ya’o mamati khö Yesu Keriso, So’aya ya’ita, Ono Lowalangi si ha samösa, nitema nina-Nia Maria khö Geheha Ni’amoni’ö, ono nono alawe Ia, no manaögö huku Ia, barö mbawa Fondrio Filato, teforöfa Ia, mate, ba lako’o. No möi Ia ba mbanu niha tou, no maoso Ia moroi ba ngai zimate me no irugi tölu ngaluo. No manahae Ia, möi ba zorugo, dumadao ba gambölö Lowalangi Ama si lö ambö fa’abölö. I’otarai da’ö mangawuli Ia dania ba wanguhuku niha sauri, awö zi no mate. Ya’o mamati khö Geheha Ni’amoni’ö, ba ufati ha sambua mbanua ni’amoni’ö, fefu niha Keriso, fa’awösa niha ni’amoni’ö, ba fangefa horö, ba femaoso mboto zimate, ba fa’auri si lö aetu. Yaduhu.

Dumadao zato

12. Fombaso fehede ni’oroi’ö ba PASKAH 2020 soroi BPHMS BNKP.

LI NI’OROI’Ö BA PASKAH 2020 SOROI BPHMS BNKP Ya’ami ira awöma Enoni awö mbanua Niha Keriso ba zi sagörö BNKP, ni’omasi’ö ba khö Zo’aya ya’ita Yesu Keriso. Siföföna ma’owai ami fefu ba wa’omasi Keriso: “Selamat Paskah”, Ya’ahowu. Ba wamalua owasa Paskah ba ndröfi andre, no so ita ba ginötö si lö sökhisökhi, börö Covid-19 (Tungö solohe ba wa’amate, si no muzaewe ba zi sagörö ulidanö. Irege, ena’ö bö te’ala niha sato, andrö wa mufalua gowasa fasumangeta ba Wemaoso Yesu Keriso ba nomoda zamösana. Tenga si’ogötö’ö da’e, ha ba zi sabata, lö ara, ba na no ilalöi ita ‘tungö Corona’ andre, ba ifuli zui tafalua wasumangeta ba Gosali. Ba ginötö si lalö, no mendrua kali ba Danö Niha tefalua wasumangeta tenga ba Gosali, ya’ia da’ö ba ginötö Nifo, ba nomo tefalua wasumangeta, me la’oguna’ö gosali nahia ndra saradadu. Ha ba mbanua si lö saradadu nifo, zamalua fasumangeta ba gosali. Baero da’ö, me alua ndruru danö döfi 2005, so 770 gosali ba BNKP zitekiko, tebai mu’oguna’ö nahia wasumangeta. Bahiza, tafaduhu’ö wa’omasi Lowalangi khöda, wa lö irai ilulu ita ba mbaho fa’atekiko, fao IA khöda, irege omuso dödöda, wa tefuli te’otomosi Danö Niha. Andrö ba ginötö Corona andre, sodanedane ba Tema Paskah 2020, me imane “Femaoso Keriso zolohe Fanötöna Si Bohou” – tekaoni ita fefu ba wanga’aro’ö fanötöna, bö ihöndrögö ita fa’ata’u, fa’abu dödö ba fa’aetu wanötöna. Tafalua gowasa Fasa moroi ba wa’owuawua dödö, me moroi ba wa’amate ba ba wemaoso Yesu Keriso, no falukha ita wangefa, fangöhöli ba fangorifi. Andrö mafarou dödöda wamalua wuawua dödö ba Paskah andre ba nomoda zamösana. Ba wamalua fanörötödö Femaoso Yesu (Paskah) ba nomoda zamösana, andrö ma’oroi’ö khömi fefu, ya’ami ira sohalöwö awö mbanua niha Keriso, ena’ö: Modanedane ba wemöna andrö moroi ba wemaoso Yesu Keriso, ya lö ata’u ita, lö humeu, he no ifasui ita Virus Corona, sanga’asogö fa’ata’u ba fa’amate. Böi mangiwa dödöda, böi aetu wanötönada, me Yesu Keriso we’ewe’e ba sangorifi ya’ita. Data’osindruhugö wangandrö, ba ta’o’ö wanuturu lala moroi ba zamatörö. Saro ita ba wamati, sifao fa’atuatua. Sodanedane ba wanötöna khö Yesu Keriso si no maoso moroi ba ngai zi mate, datatohugö wekolida ba gulidanö, ba ta’andrö ‘Wa’atuatua’ soroi Lowalangi, ba tabe’e balazi Zo’aya ya’ita Yesu Keriso, si fahuwu si sökhi khöda, he ba ginötö ‘Virus Corona’ andre, ba simanö dania na no italu’i ita. Si fao fanötöna khö Zokhö, data’osindruhugö wohalöwö, fa’atoföfö, fangatalisi, fa’aduhu ba fa’atulö dödö, ba ogaena ba wangai halöwö. Moroi ba da’ö, falukha ita howuhowu Lowalangi. Datahalö ‘löfö’ moroi ba zi no falukha ita ba Corona andre, me moroi ba wamalua “fandröndöu moroi ba zato” (jaga jarak), irege toröi ita ba nomo, tafalua wasumangeta ba nomo; ba moroi ba da’ö datatohugö wanga’aro’ö fahasambua ba fa’omasi ba wongambatö, ba nomo; tabali’ö nomo tobali ‘nahia wanuriaigö’ turia somuso dödö, ba wamahaö ösi nomo ba wamati ba ba mbuabua wa’aniha Keriso (5 Moze 6:6-9). Data’odödögö wamalua Fasumangeta ba nomo ero luo migu, tafalua wanunö ba fangandrö ero sahulöwongi baero na bongi; tatohugö wamalua fa’omasi ba niha bö’ö, ba lö göi mamalö ita wangandrö saohagölö khö Lowalangi, ya’ia na tabe’e wasömbatada, börö wangorifi andrö si no falukha ita moroi ba wa’amate ba ba wemaoso Zo’aya ya’ita Yesu Keriso. Datafalulu wangandrö salahi, moroi ba nahiada zamösana, salahi zamatörö soida Indonesia, ena’ö aro ba wahasambua, ba tobali zolohe fa’ohahau dödö ba nono wabanuasa, soi Indonesia. Börö wangorifi si no tatema moroi ba wemaoso Yesu, ma’oroi’ö khö ndra BPMR, Majelis Jemaat, BPMJ, komisi awö panitia ba zi sagörö BNKP, ena’ö böi atage, ba mu’odödögö wanga’aro’ö banua niha Keriso ba wamati, mendrua manö ba ginötö si so ita iada’e; ba ma’o’ou ita wamalua halöwö DIAKONIA ba wanolo banua niha Keriso ba ginötö wa’abasaki (krisis) andre. Andrö ma’andrö ba mbanua niha Keriso, ena’ö mibe’e wanolo si tosasa tödö, ba halöwö Diakonia. Imane Taroma Li Lowalangi: ‘Faoma mi’onoro noro dõdõ nawõmi, ba no mi’o’õ goroisa Keriso andrõ” (Galatia 6:2); ba moroi ba Roma 15:1 “Kita, yang kuat, wajib menanggung kelemahan orang yang tidak kuat dan jangan kita mencari kesenangan kita sendiri”; ba ba matai’o 25:40 ‘Ba itema dania lira razo andrõ, imane khõra: Si ndruhu niwa’õgu khõmi, ndrege nilaumi ba dalifusõgu andrõ, fondrege zi numana, ha niha ia, ba khõgu no milao da’õ.’ Simanö Li Ni’oroi’ö ba wanörö tödö Femaoso Zo’aya ya’ita Yesu Keriso, ya lö mamalö falukha ami fefu howuhowu soroi Lowalangi. Yaduhu! Gunungsitoli, 1 April 2020 Badan Pekerja Harian Majelis Sinode BNKP Ephorus                    Sekum Bendum Pdt. Tuhoni Telaumbanua Pdt. Dorkas Orienti Daeli Pdt. H. Zega, STh

13. Manunõ: BZ 111:1, “Ba we maoso Yesu Keriso”

1	Ba wemaoso Yesu Keriso, möi börö wanötönada. Te’a’aro’ö wamatida, wa nisusugi göi ita. No I’alani wa’amate, Ibe’e khöda wemöna. Lala wanöndrada fa’auri, si lö aetu, si lö taya.

14. Fangandrõ Salahi + Fangandrõ Zo’aya

1. Fangandrö salahi:.....................................................
2. Fangandrö Zo’aya

He Ama khöma si so ba zorugo, ya te’amoni’ö döi-U. Ya tobali banua-U fefu niha, ya itörö zomasi Ndra’ugö, hulö ba zorugo, ya si manö göi ba gulidanö. Öma sirugi ma’ökhö be’e khöma ma’ökhö andre. Ba efa’ö khöma horöma, si mane fangefa’öma sala ba zi so sala khöma. Böi ohe ndra’aga ba wanandraigö, efa’öga ba zi lõ sõkhi. Me ya’ugõ zamatõrõ banua-U, ba sokhõ fa’abõlõ, awö lakhömi, irugi zi lö aetu. Yaduhu.

15. Howuhowu:

Datatohugõ wekolida si fao fa’ohahau dõdõ, ya tobali ita sura Keriso, samaduhu’õ Ya’ia ba lala wa’aurida sero ma’õkhõ, ba ta’andrõ howuhowu Lowalangi (Muzizio ita fefu)

• Ya mufahowu’õ ita Lowalangi, Ya murorogõ ita
• Ya mufohaga mbawa-Nia khõda, Ya mu’ebua’õ dõdõ-Nia khõda
• Ya mufalemba hõrõ-Nia khõda, Ya mube’e wa’ohahau dõdõ khõda fefu. Yaduhu.

16. Manunõ: BZ 111:3, Ba Wemaoso Yesu Keriso

3	Yesu zindruhu zangefa’ö, same’e khöda femöna. Ya dozi oi humulu dödö, wangalui fangorifida. Me Ya’ia lembalembada, sanga’aro’ö tödöda. Sangila mamasao ya’ita, wondrugi naha Yehowa.

YA’AHOWU!