So me föna sageu Gawöni sesolo ba sebolo lali ba salawa sibai. Ero so wofo ba lagamö-gamö hogu Gawöni andrö ba wolumö’ö ya’ira na mosino ba he na moteu. Ba na so niha sohalöwö ba danö ba na’erege dödöra wohalöwö, ba lalau molombase ba mbörö Gawöni sebua hogu andrö.
Samuza ma’ökhö, tumbu ba danö wewe EO, ba ifaedogö ia ba mbörö gawöni sesolo andrö ba wolumö’ö ya’ia faböi aleu ba zino. Ba imane khönia töla Gawöni sesolo: “Anöi miyawa ba dölagu da urorogö göi ndraugö, tenga ha fofo andrö ba niha solombase ba mbörögu nirorogögu ba nilumö’ögu”.
Maoso Geo, ba ilau mananana miyawa ba hogu Gawöni, me irugi ndraha sesolo ba imane khö Gawöni: “Hadia tola ufalö’ö ngengegu ba ndrahamö andrö?”. Imane: “Tola bale, hana wa tebai, asala lö öböbö dölagu fa lö tedou ndra’o ya’i”. Itohugö zui wanöi miyawa Eo, ba ilau ia ba ndraha sise’ise ba ba mbulu ba ba lailai Gawöni, ba ibörögö ikabi ngengenia ndraha ba bulu awö döla irugi lailai Gawöni. Imane Awöni: “He Eo? Alai na öbunu gamanöitau he?”. Imane Eo: “Lö’ö le! Me no ölumö’ödo i’otarai me ide’ide do irugi ebuado moroi ba hogumö andre ia da’a, ba omasido göi na usulöni ia khöu, da ubalugö ndra’ugö göi falö marase’ö ba deu ba ba zino.
Maoso Geo, ikabi ba iku’öi mbulu ba tuturu ba daha awö döla Gawöni no mege, irege itötöwui hogu fefu, ba mangarö-ngarö Gawöni ibe’e, ba iduhugö ikabi wamöbö Awöni, irege adudu mbulu ba afatö ndraha awö duturu, ba mate Gawöni.
Fefu wofo si möi-möi manuge ba hogu Gawöni no ba oi mangenu-ngenu ba hogu geu side-‘ide si so ba zinga Gawöni si no ibunu Eo andrö, ba me möi zui niha sokhö kabu andrö, omasi ia molombase mena’ö, ba me no ibunu Eo Gawöni andrö, ba maoso niha no mege, ihalö wato, ba i’obö göi Geo, si no mokabi töla Gawöni, ba me ifanana nasa ia ba wokabi hogu zinanö si so bakha ba kabunia andrö, ba mate Geo andrö sa’ae.
Amaedola: BÖI BÖBÖ GAMANÖITAU HULÖ EO AWÖNI, BÖI OLIFU DANÖMÖU FAKHE SIRADI, BÖI OLIFU GULIU BUA GAMANDRIKI.
