ROROGÖ GÖLIA ULIDANÖ

ROROGÖ GÖLIA ULIDANÖ

(3MOZE 25:1-13)

He ya’ami talifusö, ni’omasi’ö Zo’aya
Hadia mbörö gotari gotara,
Hadia danömö gangerönuada,
Hadia mbörö wa falukha ita wangala,
Hana wa oi mangarö niha ba gölia,
Hana wa oi me’e dödö gomböila ?

Hana wa oi alua molö sebua
Hana wa oi aruru danö salawa
Hana wa adöni ŵa’a geu sebua
Hana wa oi aleu mbulu geu manawa
Hana wa oi mate mbawi lö tandraŵa
Hana wa oi ase’e manu, urifö niha,
Hana wa oi muliha dungö Corona sama’ala,

Hadia zalua ba gulidanö ölia,
He si so si yaŵa ba mbanua,
He si so ba gulidanöda,
He si so barö danö bakha,
Oi mangaröngarö mu’ira
Oi me’e fa’alai ina,
Oi mowengu, börö alele gomböila,
Oi mange’esi börö wa’amate niha.

Na tahalö wangerönu, ira ama ina,
Ta’anofuli ba Daromali Lowalangida,
Ba tefaehagö khöda mbörö wa’afawuka,
Tebotokhi ba dödöda mbörö wa’ate’ala.
Ya’ia me no olifu niha goroisa,
Ya’ia me no iböbö niha fa’atebakha,
Ya’ia me no ihawui niha fa’asilöyaŵa
Ya’ia me faya’osa, fakhögusa ba fa'ögusa
zamatörö fa’auri niha.

Oi lö fondrorogö fefu niwöwöi Yehowa,
Oi lahori geu ba mbenua,
oi lase’e ba danö zinanö aurifa,
Oi latibo’ö zasao si lö obou, tobali fangala
Oi lata’unöi nungo nidanö, börö wa’atebakha,
Oi ra’iö zau awö noho nihofo niha,
Oi ahori gatua, umbu aurifa fefu gomböila.

Mifaoso mifondrondrongo Daromali-Nia,
Mifalalini khömi gera’era,
mitanö ba hunö dödö goroisa-Nia,
Muböhöi gamuata fa’atebakha,
Mubato mbuabua fa’olua’lua,
Rorogö danö, sotöi Adama,
me no da'ö mböröta me te'ehao niha,
Rogogö niha (Adamo), si no famaedo Yehowa,
Fa’omasi, fangehao, fa’oböwö da’ö zomasi Ia,
Ena’ö ehowu fefu gomböila danga Zo’aya,
Falukha zalöfö, tödö oi owuawua,
börö huwuhowu soroi Nama.

Ba hewisa wamalua ba lala wa’aurida,
Hewisa mböwö si sökhi somasi Zo’aya?
So dombua goroisa niwa’ö ba daromaliNia,
Rorogö danö, sinanö, awö fefu zaliwaliwa ba danö gölia,
Böi höndrögö, böi fera’ö nawö sangaröngarö, si tosasa,
Da’e nifotöi döfi sabato, ero fitu fakhe fa’ara,
Da’e nifotöi döfi omasi’ö, ero 50 fakhe fa’atua.

Na tahalö börö dumaduma,
föna Gizera'eli, banua Zo’aya,
Lafolombase danö,
ero döfi si fitu, lö fohalöwö,
Lö labasi zitoröi ba mböna,
tana khö zinumana,
Fefu mbe’elö, lö lasugi, labe’e saohagölö.
Da’ö nifalua na no 7 wa 7 fakhe fa’ara,
Lafalua wangefa ba zi tosasa tödö
Lafalua wa’omasi ba niha sinumana,
Me fefu zi so khöra, he bua danö, bua zinanö
Ni’amulagöNia, börö wa’ebua dödö Zo’aya,
Ba mbanua-Nia si no Ifili, I’omasi’ö.

Lö mendrua manö ita, si no banua Zo’aya,
Si no ihöli I’orifi Yesu So’aya,
Si no tobali soroi yomo Lowalangida,
Si no falukha döfi omasiö, döfi fangefa,
Si no ifahowu’ö lö fo’ambota.

Ba ginötö wa’atosasa dödö
ba ginötö wa lö lalalala dödö,
Tahalö khöda wamohouni tödö,
Taböhöi wa’atebakha, tabato wamakao awö,
Taröi waya’osa, fa’asilöyaŵa, ba fa’afökhö dödö,
Taröi wakhöguta awö wangosiwawöi awö,
Datafalua wa’omasi ba wanolo sitosasa tödö,
Me niha (adamo) no famaedo khilikhili Zokhö.
Data’ehao, ta’arorogö gölia ulidanö,
Me tanö (adama) no föfö wangehao ya’ugö.
Na mangarö danö, ba mangarö’ö
Na me’e gulidanö, ba me’e ndra’ugö,
Na fawuka ba tekiko gölia ma’asagörö,
Ba tobali böröta wamakikomö.
Andrö rorogö Gadama awö Gadamo.

Andrö tanö ba dödö
Niwa’ö ba zinunö 104:24
“Ha lö oya ngawalö halöwöU ya’ugö Yehowa,
Fa’atuatuaMö wamalua ya’ia fefu,
No anönö danö niwöwöiMö andrö.”
YADUHU.

SELAMAT BERIBADAH, TUHAN MEMBERKATI

Sumber: Pdt. Tuhoni Telaumbanua (Ephorus BNKP)