Tenawa wa’atebakha

Luka 12:13-21

Ya’ita banua Zo’aya................

Ba daroma li nibasoda ba zura Luka 12:13-21 andre, si nangea tatöngöni ya’ia da’ö: lö fasala na oya harato, lö fasala na oya gefe, lö fasala muhaogö wo’angeragö hewisa ena’ö monönö wa’oya harato, lö fasala na mu’angeragö hewisa lala ena’ö monönö wa’oya gefe, lö fasala na mu’angeragö hewisa lala ena’ö harato ma gefe si no so lö tekiko, lö fasala na ta’irö’ö haratoda. Sifasala i, ya’ia da’ö fa’atebakha (ketamakan). Wa fasala wa’atebakha andre, me lualuania fa’atekiko noso, lö tasöndra wa’auri si lö aetu.

Me fozu wa’atebakha andre fa’atekiko, da’ö itegu ita ba duho huhuo ba zima’ökhö andre, ena’ö ta Tenawa Wa’atebakha (Jauhilah Ketamakan).

Me no awai mamahaö Yesu (faigi faza 12:1-12), tohare samösa niha sangondrasi ya’ia, imane “He Samahaö.....” (faigi ngawua 13). Samahaö ba ginötö da’ö, asese ifalua halöwö wangatulö’ö ma fangetu’ö (memutuskan). Me Yesu andrö no Samahaö Ia göi , da’ö la’andrö Ia ena’ö I’agö gotalua ba wamaosa gondröita zatua.

Niha sangondrasi Yesu andre, omasi ia na lafaosa khönia gondröita zatuara, ena’ö moharato ia. I’ondrasi Yesu ena’ö itema zinemania, ena’ö itugu kayo ia.

Ba ginötö andre, ato niha sangondrasi Yesu, möi ba gosali, owölö’ölö, ibe’e wasömbata, ohitö dödö ena’ö kayo. Na so niha simane da’ö, ya ihaogö ifondrondrongo wamahaö Yesu andre, ena’ö so wamohouni eraera.

Me no awai mamahaö Yesu (ngawua 1-12), niha sangondrasi ya’ia andre, lö ibe dödönia zawena ifahaö Yesu, lö aiwö ia, ifatunö harato zatua, si lö amakhaitania ba daroma li nifa’ema Yesu ba ngawua 1-12.

Ba da’e ta’ila, börö wa’atebakha, lö khönia fo’angenanöi (sopan – santun), lö ba dödönia taroma li, si so ba dödönia ena’ö lafaosa khönia gondröita zatua.

Me lö sökhi lualua wa’atebakha andre, da ta be ba dödöda daroma li si tesura ba zura 1Timoteo 6:9-10, Ba sedõna mangebua ana’a, ba gõna fanandraigõ, ba tandraw̃a, ba oya wangisõ fayafaya ba fangisõ fama’ala, sangahanigõ niha ba wa’atekiko, ba ba wa’amate. Noa sa baya ngawalõ hadia ia zi lõ sõkhi fefu wa’omasi gana’a andrõ, ba no elungu õsa, no larõi wamati, wangalui da’õ, ba no oya nifobõrõra khõra fa’afõkhõ.

Hewisa ita ba gana’a (gefe)? Hadia so khöda wa’atebakha? Na so, da tatenawa da’ö, me si lö sökhi wozu zimane da’ö.

Na ta baso ba gamabu’ula li siföföna, ba no muhaogö hewisa lala ba wamaosa gondröita. Na tafaigi, niha sangondrasi Yesu andre, itörö lala satulö ena’ö lafaosa khönia harato zatua. He wa’ae atulö nifaluania, tobali fasala me tefodanedane ia ba wa’atebakha.

Ha börö gondröita (harato) ba alö (ataya) wa’omasi ba dalilfusö, ha börö gondröita tobali fandröndröu wa’atalifusöta. Ato niha sitobali singo (singa) ma tobali harimo na inötö wamaosa gondröita zatua.

Hewisa ita na inötö lafaosa gondröita, hadia sökhisökhi manö na sa ita ma tobali singo? Ato niha zitobali singo ba ginötö wamaosa dolotolo si’otarai famareta (BST, PKH, BLT, BPNT, dll) ba ginötö korona, böi so ba gotaluada zimanö.

Ba ngawua si 14, ta’ila wa Itegu niha andre Yesu. Lö Igo’ö (lö ibe) ni’andrönia. Hadia mbörö?

1. Ibali’ö Yesu solo’ö ba samofozu somasimasi ia.

Ya’ita banua Zo’aya, böi tadönadöna wa tatema ni’andröda khö Yesu, na ni’andröda andrö ba zomasimasi ita, lö ifondrondrongo Yesu zimanö. Imane ba zura Yakobo 4:3, Mangandrõ ami, ba lõ mitema, me si lõ sõkhi wangandrõmi andrõ; ena’õ mu’a ia, ba wangisõmi andrõ.

2. Lö omasi Yesu na labali’ö Ia razo (samatörö) sohalöwö ba gulidanö si lö amakhaitania ba mbanua zorugo.

3. Lö omasi Yesu isawö niha si no mufataro ba halöwö wamatunö simane famaosa gondröita zatua.

4. Börö me aösöaösö Yesu ba halöwöNia, ya’ia da’ö so amakhaita ba mbanua zorugo. Imane ba zura Luka 19:10, Ba da’õ sa mõi Nono Niha, ba wangalui si no elungu ba ba wangorifi ya’ia.

Ya’ita banua Lowalangi:

1. Böi ta be abula dödö ndra enoni Lowalangi ba wolohe ba lala ngawalö gabula dödö so amakhaita ba harato gulidanö, ba simanö göi böi ta be busibusi dödöra, ngawalö halöwö sigideide bakha ba gosali.

Nitöngöni: he wa’ae böi tabe noro ma böi ta be abula dödöra ngawalö gabula dödö sigideide, ba sindruhunia tola lafalua halöwö wangatulö ira enoni Lowalangi, dumadumania wangatulö’ö niha sifa’udu.

2. Böi olifu ita halöwö ba mbanua Lowalangi ha börö halöwö ba gulidanö. Böi olifu ita halöwö ba ba gosali ha börö halöwöda sero ma’ökhö (ba gödo, ba kabu, ba dadaoma famareta, ba tanö bö’önia). Böi ha börö halöwöda, ba taröi taröi halöwö khö Lowalangi, böi ha börö halöwö (harato) taröi Lowalangi.

Ketamakan, fa’omasi ba gana’a ma fa’atebakha, ba li Heleni lafotöi PLEONEXIAS (PLEION: lebih, töra; EKHEIN: mempunyai, mo khö]. Eluahania: ohitö dödö ena’ö töra wa’oya gokhöta/harato, fagamböambö manö sifao fekökö ba zi no so.

Oya nifotöi fa’atebakha, dumadumania: kefe, sarewa – baru - gaun, sifatu, tasi, gamagama, omo, hondra - moto, ba tanö bö’önia na sa. Hadia wa’atebakha si so ba wa’aurida? Na so, tenawa da’ö.

Ba da’e ifahaö ita Yesu, he wa’ae oya harato ba mate atö niha. Eluahania, tenga harato mbörö wa’auri niha, hizai börö wa’ahakhö dödö Nama. He wa’ae so harato na fa’atebakha zi so khö niha da’ö ba lö khönia fa’auri sindruhu (kehidupan yang sejati / sesungguhnya). Ya’aboto ba dödöda da’e.

Duhu moguna harato ba gulidanö, moguna gefe, ba hiza’i, I’o’ou ita Yesu ena’ö so gana’ada ba mbanua Lowalangi.

Ba daroma li andre, ta’ila niha sohalöwö sadölö tödö (jujur) itegu ia Yesu me lala wohalöwönia lö atulö (tefodanedane ba wa’atebakha), na niha simane da’ö itegu Yesu ba mendrua manö niha sohalöwö si lö atulö, mofönu abölöbölö Yesu ba niha simanö.

Sambua dumaduma, hewisa na tasöndra dompet ma tasi si so nösi (kefe), ba so KTPnia ma surasura zokhö ya’ia, hadia tafuli? Imane taroma li ba zura 5Moze 22:1-3, Na õ’ila zaw̃i dalifusõu si suna ba ma biribirinia, ba bõi zi lõ õtolo; õ’ohe mangawuli khõ dalifusõu. Ba na arõu mbanua dalifusõu andrõ, ba ma na lõ õ’ila ha niha, ba õhalõ khõu ua, õfonaha ba khõu, irege i’alui talifusõu andrõ, ba õfuli khõnia dania. Ba õmanõ gõi na kalidenia, ba he na nukhania ba he hadia ia fefoe, si no aekhu khõ dalifusõu, na no õsõndra; lõ tola lõ õrorogõ. Dompet ma tasi ma hadia ia nisöndrada, tafuli. Na tafuli ba lö göna ita fönu Lowalangi, na lö mufuli ba göna fönu zimanö. Böi tahalö, da’ö, böi tamane “Harazaki, howuhowu Lowalangi da’e, buala Nama moroi ba zorugo da’e”. Böi. Okhöta niha da’ö.

Ato niha, na itugu oya haratonia ba itugu oya gabula dödö. Lualuania, ba arörö ia ba haratonia, ba lö inötönia sa’ae khö Lowalangi. Niha solau simanö ba abua sa’ae na lö ifaigi ia Lowalangi (baso Amaedola 1:24-28).

Na so wa’atebakha, Fa’akayo andrö ba lö ibe’e khöda wa’ahono dödö, lö ibe’e abuso ita (tidak akan membawa kepuasan). Imane ba zura Sangombakha 5:9, Somasi ana’a, ba tebai abuso ana’a, ba somasi na ebua gana’ania, ba lõ isõndra zi ndruhu hare ba da’õ. Si lõ boto gõi da’õ.

Niha si so fa’atebakha, ohitö dödö manga – mamadu – omuso dödö. Me ba da’ö aolo dödönia ba lö fangalui banua Lowalangi, lö monaha (lö mowua) daroma li. Imane ba zura Matai’o 13:22, Ba nifazaewe barõ ndroi, ba da’õ ia: Irongo daroma li andrõ, ba so wa’abu dõdõ ba guli danõ andre, awõ wamaelungu andrõ, ba gana’a, ba ibunu daroma li, ba tobali lõ mowua. Na ba da’ö aolo dödöda, da tatöngöni zi tesura ba zura Zangombakha 11:9, imane: Omusoi’õ dõdõu, ya’ugõ ono matua, fatua ono matua ndra’ugõ, ya sowuawua dõdõu, gõtõ wa ono matua ndra’ugõ, ba tõrõ nidõnisi dõdõu ya’ugõ, awõ ni’ila hõrõu, ba bõi zi lõ aboto ba dõdõu, wa i’ohe ba wanguhuku dania ndra’ugõ Lowalangi, bõrõ da’õ fefu.

Sambö eraera niha sangondrasi andre iwa’ö Yesu, me so khönia wa’atebakha. Sambö eraera ia he wa’ae oya haratonia, ba onekhe göi.

Ya’ita samati, hewisa ita na’ifaigi Yesu: hadia iwa’ö khöda: sambö eraera ma si so eraera? Ya si so tödö ita, ya si so eraera ita föna Yesu.

Lafotöi niha andre sambö eraera, börö me:

1. Imane tödönia, börö harato wa ohahau dödö.

2. Ha fa’auri iya’e ni’eraerania, lö ba dödönia aurifa nosonia ba luo we’aso Yesu.

3. Ha ösi gulidanö ni’eraerania, lö ba dödönia banua Lowalangi

Ya’ita samati böi olifu ita ena’ö ta’ofönai’ö wangalui banua Lowalangi andrö (Matai’o 6:33). Ba ngawalö mbuala nitemada, da tafosumange Lowalangi.

Imane ba zura 1Korindro 10:31, Ba he si manga ami, ba he samadu hadia ia, ba ma hadia nilaumi, ba ba wamosumange Lowalangi milai ia fefu.

4. Lö i’andrö saohagölö khö Lowalangi ba zi no so.

5. Ha ya’ia ni’eraerania, talifusö – awö – niha bö’ö, lö i’eraera.

Ya’ita banua Yesu, ba nibasoda andre, niha sikayo ba tefotöi ia sambö eraera. Tenga ha niha sikayo zitola ambö eraera, niha si lö kayo göi tola ambö geraera. No na sa lö kayo ba ambö geraera, da’e afökhö sibai. No na sa lö kayo ba ambö geraera, ba fahöna wa’afaökhö dödö ba nawö, fahöna watiusa, da’e afökhö sibai. Tenga börö wa’akayo niha andre wa tefotöi ia sambö tödö, hiza’i börö me lö sökhi geraerania, so wa’atebakha. Moguna ta’ila wa ato göi zifao khö Yesu niha si kayo si so eraera.

Tola manö alua wa’amate si lö mudönadöna ba niha, gofu ha niha ia. Börö da’ö ena’ö ya’atuatua ita, tahönagö haratoda ba mbanua Lowalangi.

Si lö eluaha sa’ae harato na no mate ita, si so eluaha ya’ia da’ö na tasöndra wa’auri ba mbanua zorugo. Si lö eluaha sa’ae harato na no mate ita, ba hiza’i mo’eluaha ba ndraono ba ba ma’uwu, börö da’ö ta’alui harato ba gulidanö molo’ö lala satulö ba böi olifu ita wangalui banua Lowalangi, ba fefu zi so khöda tafuli tobali sumangeNia.

Amarahuta wa’auri niha na ba harato gulidanö aolo dödönia, na lö ba dödönia banua Lowalangi, lö khönia fa’auri. Imane Yesu ba zura Matai’o 6:19-21, Bõi mihõna khõmi girõgirõ ba guli danõ, nifakiko hama ba ni’ā howu, nikharu zanagõ ba nitagõ. Ba zorugo mihõna khõmi girõgirõ, ba zi lõ ifakiko hama, ba zi lõ i’ā howu, ba zi lõ lakharu sanagõ, ba zi lõ latago. Ba zi so girõgirõ khõu sa, ba da’õ gõi so dõdõu dania. Ba zura Matai’o 16:26, “Hadia sa guna ba niha, na isõndra harenia fefu hadia ia zi so ba guli danõ, ba na te’ala ia nosonia? Ba hadia ena’õ nibe’e niha hõli nosonia?”.

Tola so haratoda ba zorugo na sindruhundruhu faduhu dödöda khö Yesu, na sindruhundruhu ta’o’ö daroma liNia.

Da tatenawa wa’atebakha. Duhu moguna harato ba gulidanö, ba böi olifu ita göi ena’ö ta’odödögö wanga’asogö haratoda ba zorugo.

Da ta’alui harato ba gulidanö, molo’ö lala satulö ba si duhu. Böi ha börö wangaluida harato ba gulidanö ba awöda niha tefakao. Simane niwa’ö ba nitanö ba dödö, moroi ba zura Gamaedola 22:22, Bõi osindra’ui zi so khõ zi numana, me no si numana ia, ba bõi hundragõ zi no gõna famakao, ba mbawa gõli.

Ya’itolo ita Lowalangi.

Ya’ifahowu’ö ita lowalangi.

Yaduhu.