AGENDRE BA MBONGI WAMA’ANÕ TÕDÕ (KAMIS PUTIH)

Kamis, 09 April 2020, Bözi 7 ba zi bongi, Nifalua ba Nomo Mbanua Niha Keriso

1. Fangowai

Sondr. Agendre Sato Sondr Sato

: : : :

Ya’ita fefu sowulo, ni’omasi’ö Keriso, Ya’ahowu ita si fao ba Mbongi Wama’anõ Tõdõ andre. No owulo ita ba wamalua fasumangeta khö Lowalangi ba nomo andre, sifao banua niha keriso sato ba nahiara zamösana ba wanõrõ tõdõ famakao Keriso, awõ ba wo’angerõnusi dumaduma si no Ibe’e Keriso ba ba wamalua oroisa-Nia ba wangomasi’õ awõ. Bakha ba wa’omasi Keriso, mitema wangowai fa’atalifusõta: Ya’ahowu Ya’ahowu! Ya faofao khömi Lowalangi, Yafao khöu GehehaNia.

2. Manunõ: BZ 191: 1-2, Na Owõkhi Dõdõda

1	Na owökhi dödöda, tabu ta’ondrasi Yesu. Khöda göi Ifa’ema, Ibokai nidanö gumbu. Lö falukha ba mbö’ö ha khö Yesu so da’ö.
2	No ikaoni So’aya, zabu tödö ba horöra. Sanutunö khö-Nia, fefu ngawalö zalara. Ha zi tosasa tödö, ae khö Yesu angandrö.

3. Votum

Sondr Sato

: :

Da tafohohou wa’aurida andre ma’afefu ba wa ha sambua khõ Zo’aya, muzizio ita fefu; No owulo ita ba da’e, ba dõi Lowalangi Ama, ba dõi Nono-Nia Yesu Keriso, ba ba dõi Geheha Ni’amoni’õ. Fangorifida ha ba dõi Yehowa sombõi banua si yaŵa awõ danõ. Yaduhu Mudadao zato

4. Fombaso Taroma Li Lowalangi: II Moze 12:24-28

24	Ba milaoe da’õ, amachoita chõoe ba ba nga’õtõoe, iroegi zi lõ aetoe.
25	Ba na miroegi dania danõ andrõ nibe’e Jehowa ochõtami, si mane nifaboe’oenia, ba mitõrõ da’õ wamosoemange Lowalangi.
26	Ba na lasofoe dania chõmi iraonomi, na lamane: Hadia chõmi wamosoemange andrõ?
27	ba mimane chõra: Soemange fasa chõ Jehowa, sanaloe’i omo Ndraono Gizeraëli, me ilaoe ba Ndrawa Miseraji, fa lõ ibabaja zi so jomo chõda. Ba lafaõndrõ ira sato, mangaloeloe.
28	Ba mõi Ndraono Gizeraëli, la’o’õ niw̃a’õ Jehowa chõ ndra Moze A’aroni; da’õ lalaoe.

5. Fangandrõ Wangefa Horö, Muzizio ita fefu...........

Mangandrõ ita:

He Lowalangi si lõ ambõ fa’abõlõ ba fa’aduhu. Mamati ndra’aga, wa lõ si tola tobali sondrorogõ ba sangorifi ya’aga, baero Zo’aya ya’aga Yesu Keriso. Andrõ mõiga ma’alui wa’ahono dõdõ ba fondrara dõdõ ba wa’aurima andre khõ Yesu Keriso. Tefakao sibai ndra’aga ba horõma, si no mamõbõ ya’aga. Asese ambõ ndra’aga ba wa’afaduhu dõdõ, ba wamati ba ba wanõtõna khõ Zo’aya. Lõ fangosindruhugõ ba wangomasi’õ awõ, asese mawauliwauli wamalua  amuata si lõ enahõi; mafalua zi lõ sõkhi ba zi tobini, ba si manõ gõi ba zanehe  niha  he ba zi ha ya’aga samõsa ba ma zui ba gotalua niha sato. Sindruhundruhu wa no i’u’uni ndra’aga horõma. He Lowalangi, hakhõsi dõdõ-U khõma, efa’õ ndra’aga bõrõ wa’omasi ba fangõhõli Zo’aya ya’aga Yesu Keriso....Yaduhu.

Manuno: “Na ubini’õ horõgu khõ-U Yesu…..”
Turia wangefa horõ:

“Simanõ sa wa’omasi Lowalangi nõsi gulidanõ, no ibe’e nonoNia andrõ, si ha sambua, ena’õ lõ tekiko dozi samati khõNia, ena’õ so khõra wa’auri si lõ aetu. Yaduhu.”

Dumadao zato

6. Manunö: Buku Zinuno 261:1-3 + 6 (Te’owuloi wasömbata)

1	Ya’e zumange fasömbata. Ma’ohe sumange Yehowa. Reff: Ma’andrö khö-U fahowu’ö. Zumange ni’ohema khö-Mö
2	Ya’e zumange fasömbata mabe’e soroi ba dödöma. Reff:..................
3	Ya’e zumange fasömbata. Buala si’otarai Nama. Reff:..................
6	Ya’e zumange fasömbata. Ma’aohasi gölö Zo’aya. Reff:..................

7. Manunö: Buku Zinunö 163:1 “Uhonogö sibai dödögu….”

Uhonogö sibagi dödögu, ba wamondrondrongo li-Mö Yesu Mangalulu ndra’odo föna-U, ba gametahö-Mö iada’a Öbayoini Eheha-U Yesu, dozigö mbanua samati khö-U Ubokai dödögu khö-U Yesu, nahia daroma li-U Taroma li-Mö, lö fa’atebulö Menewi ma’ökhö, ba si’ogötö’ö, lö sa mamalö Taroma li-Mö, si möi fangabölö Utema’ö soroi ba dodo, tolo ba wolo’ö

8. Angerõnua: 1 Korindro 11:23-32

23	Ja’odo sa, ba no chõ Zo’aja oetema, nifa’emagoe chõmi gõi: So’aja ja’ita, Jesoe, me bongi andrõ, me te’ā mbõlinia, ihalõ roti,
24	ba i’aohasi gõlõ Lowalangi, ba iboboto roti ba imane: Botogoe da’e, salahimi, mitõrõtõrõ tõdõmi ndra’o ba zi mané.
25	Si manõ gõi mako, me no aefa manga ira, ba imane: Amaboe’oela li si bohooe mako andre, ba ndrogoe. Gofoe ha me oega mibadoe da’e, ba mitõrõtõrõ tõdõmi ndra’odo.
26	Ha me oega mi’ā roti andrõ sa, ba ha me oega mibadoe nõsi mako andrõ, ba mi’ombacha’õ wa’amate Zo’aja, iroegi so ia.
27	Tobali, na so zi manga roti andrõ, ba ma samadoe õsi mako andrõ, chõ Zo’aja, si tenga si nangea, ba mosala ia ba mboto Zo’aja andrõ ba ba ndronia.
28	Ba jamoesechegõ dõdõnia zamõsana, ba awena jamoe’a wõfõ roti andrõ ba jamoebadoe wõfõ nõsi mako andrõ.
29	Si manga sa ba samadoe, ba i’ā chõnia hoekoe ba ibadoe chõnia, na lõ ifaehoesi mboto andrõ.
30	Andrõ ato ba chõmi zambõ fa’abõlõ ba sofõchõ, ba tenga si lõ ato zi no mate.
31	Ba na ja’ita zangoehoekoe ja’ita, ba lõ tehoekoe ita ena’õ.
32	Ba na tehoekoe ita, ba ni’otoe’õ ita, chõ Zo’aja, ena’õ lõ tetibo ita, awõ niha goeli danõ.

FATOMESA NI’AMONI’Ö 1Korindro 11:23-32 Bongi wama’anö tödö ma asese tatötöi Kamis Putih, inötö wamasugi ba dödöda ngawalö zalua fatua lö lara’u ba laforöfa Yesu. So dombua zinangea itörö tödöda ba ginötö da’ö: 1) Bongi wemanga wasa nifalua Yesu awö nifahaö; 2) Fanasai ahe nifalua Yesu khö ndra nifahaö. So göi zame’e eraera tanö bö’ö wa ba mbongi wama’anö tödö mutörö tödö göi wangandrö nifalua Yesu ba Gezemane. Tafalua wasumangeta bongi andre ba wo’angerönusi ngawalö zalua simanö. Sadöni dödöda me ba mbongi wama’anö  tödö simane, ibe’e khöda Yesu dua faosatö goroisa-Nia, si lö tola lö ta’o’ö. Ba mbongi wemanga wasa awö nifahaö, ifa’ema Yesu goroisa ba wamalua fatomesa ni’amoni’ö. Ba wamalua fanasa ahe, ifa’ema Yesu goroisa ba wamalua fangomasi’ö awö. Andrö wa ba li Inggris, bongi wama’anö tödö lafotöi Maundy Thursday, eluahania ba li Indonesia Kamis Amanat ma Ngaluo Wame’e Oroisa. Famotöi simane, faudu na ta’angerönusi hadia geluaha zalua me luo da’ö: Ifa’ema goroisa Yesu ba nifahaö-Nia. Fatomesa ni’amoni’ö nitemada ero na inötö, modanedane ia ba wango’ou daroma li Lowalangi: 1) Famalua owasa fasa ba niha Yahudi, nifalua eroero omo me so ira ba danö Miserayi ba wanörö tödö fangefa’ö Yehowa ya’ira moroi ba wa’amate, nidönia’ö Moze (2Moze 12:1-8, 11-14); 2) Fangoroi’ö femanga gö ni’amoni’ö nifalua Yesu khö ndra nifahaö (Matai’o 26:26-29); 3) Fangöhöndrögö geluaha wemanga gö ni’amoni’ö, roti ba agu ba watomesa ba mbanua niha Keriso ba Gorindro (1Korindro 11:23-32). Tuho nihöndrögö ya’ia da’ö, femanga wasa ba niha Yahudi no fanörö tödö ba fangaohasi ölö Lowalangi ba zahölihöli dödö si no Ifalua ba wangefa’ö banua-Nia ba wa’amate. Ba watomesa ni’amoni’ö göi, no fanörö tödö ba fangaohasi ölö Lowalangi ba wamakao nitaögö Yesu, fa’amate-Nia ba röfa ba wangefa’ö banua-Nia ba wa’amate börö horö. Börö da’ö ba gangerönuada bongi andre, ifa’ema Faulo wa moguna sibai aboto ba dödöda geluaha watomesa ba wanema roti awö agu. No ni’amoni’ö sibai ba mo’ohitö ia sitebai faefa ba lala wamatida ya’ita niha Keriso. Moroi ba daroma li Lowalangi andre, aboto ba dödöda wa fatomesa ni’amoni’ö no oroisa Yesu Keriso khö ndra Sinenge si no falukha khö Yesu. He wa'ae fatomesa da’e alua ia ba götö silalö, ba i’ohe ita mi föna ba lala wamatida me mufulifuli mufalua ia. Ba ginötö tatema gö ni'amoni'ö ba wa'abölö daroma li Lowalangi alua wahasambua zamati ba khö Yesu Keriso. Fanörötödö wa Yesu Keriso zi no mate salahida ba ginöto ta’a roti ba tabadu agu. Eluahania tenga ha tatörö tödö Yesu Keriso ba wemanga gö ni'amoni'ö, iza’i ta’o’aurifagö ba  tatema'ö we'aso-Nia ba wa’aurida samösa. Tenga ha tatörö tödö wa'amate-Nia safönu fa'afökhö, hiza göi tatörö tödö wemaoso-Nia safönu fa'omuso dödö. Andrö wa bawanema femanga gö ni’amoni'ö tenga ni'aohasi manö me tanga femanga sito'ölö ba wangabusoi’ö, no faebua dödö ba wanema howuhowu fangefa horö ba bu’uli wanema fa'auri si lö aetu. Da’e wa’omuso dödö zamati same’e fa'ohahau dödö si tebai ibe'e niha gulidanö. Bongi da’e tefasugi ba dödöda ba ta’omusoi’ö dödöda wasumangeta ba mbongi wamaa'anö tödö. Hana? Me tatema goroisa  Yesu wamalua fatomesa ni'amoni'ö ba oroisa-Nia ba wangomasi’ö awö. Tenga  ha nitou’ö manö dali ita na tafalua ma lö’ö. No da’e wogaonida  moroi khö Yesu ba wanema fa’ebua dödö-Nia. Na fao ita ba wanema fa’ebua dödö-Nia. Na fao ita ba wanema gö ni’amoni’ö ba no sanörö tödö  fa’omasi Zo’aya ita. Ya’ita si no manema ha sambua boto, ha sara lala wamati ba ha sambua wa’omasi. Andrö börö da’ö na ta’o’ö goroisa-Nia ba we’amöi ba watomesa ni’amoni’ö ba ta’o’ö göi goroisa-Nia ba wamalua fa’omasi ba nawö. Fa’abölöda ba mbawa wamakiko si so ita ia da’e börö covid 19, ha fa’abölö wangefa si no ifalua Yesu si no tatema. Böi ata’u ita, i’efa’ö ita ba wa’amate si manö da’ö. Tafati ba ta’anötöna. Barö da’a göi so nifa’ema wamareta enaö böi ahatö ita ba niha, böi fara’u tanga, ta’aröu’ö ita ba zorudu ato niha, moroi ba nomo mohalöwö, moroi ba nomo tefahaö ba ba nomo talau wasumangeta khö Lowalangi. Moguna da’e enaö böi tebolosö wa’agönö dungö ba niha. Sindruhunia abua khöda wamalua me tefambambö wariawösa ba fandröndröu gamaikhatada ba niha. Ha gasagasa da’ö! Ba mbongi wama’anö tödö ia da’e, ifasugi ba dödöda wa oroisa Yesu wangomasi’ö awö ha sambalö tafalua. Hewa’ae fandröndröu mboto ba böi fandröndröu dödö. Fa’omasida ba fa’atalifusötada ba khö Zo’aya tebai iba’agö gofu hadia ia. Da tafa’anö dödöda wanema buala fa’ebua dödö-Nia ba tafa’anö dödöda göi ba wamalua fa’omasida ba nawö. Yaduhu.

Manunö: “No mafondrondrongo liU

1.      No mafondrondrongo li-U, Lowalangi So’aya Tanö ba dödöma ia, faböi olifuga Fahowu’ö ia khöma, ena’ö ohahau dödöma fefu Heta ba dödö zi lö sökhi, ma’o’ö niwa’ö-U

9. Tuho wamati

Me no tarongo daroma Li Lowalangi, ba da tafaogö lida wamaduhu’ö famatida ya’ita niha Keriso fõna Lowalangi, muzizio ita fefu........ endronga lida:....

Ya’o mamati khö Lowalangi Ama si lö ambö fa’abölö, somböi banua si yaẅa awö danö. Ya’o mamati khö Yesu Keriso, So’aya ya’ita, Ono Lowalangi si ha samösa, nitema nina-Nia Maria khö Geheha Ni’amoni’ö, ono nono alawe Ia, no manaögö huku Ia, barö mbawa Fondrio Filato, teforöfa Ia, mate, ba lako’o. No möi Ia ba mbanua niha tou, no maoso Ia moroi ba ngai zimate me no irugi tölu ngaluo. No manahae Ia, möi ba zorugo, dumadao ba gambölö Lowalangi Ama si lö ambö fa’abölö. I’otarai da’ö mangawuli Ia dania ba wanguhuku niha sauri, awö zi no mate. Ya’o mamati khö Geheha Ni’amoni’ö, ba ufati ha sambua mbanua ni’amoni’ö, fefu niha Keriso, fa’awösa niha ni’amoni’ö, ba fangefa horö, ba femaoso mboto zimate, ba fa’auri si lö aetu. Yaduhu.

Dumadao zato

10. Manunõ: BZ 459:1, Aine Khõ Yesu

1.      Aine khö Yesu, tabu khö Yesu, möi ita fefu ba wangalulu. Ta’oigö dödö, wangandranö howuhowu, tödö satulö ba sohahau. Reff:          Da taröi zi lö faudu, taböhöi zi lö duhu.                   Töngöni goroisa Yesu, me lö aratö wanguhuku.

11. Fangandrõ Salahi + Fangandrõ Zo’aya
12. Fangandrö salahi
13. Fangandrö Zo’aya

He Ama khöma si so ba zorugo, ya te’amoni’ö döi-U. Ya tobali banua-U fefu niha, ya itörö zomasi Ndra’ugö, hulö ba zorugo, ya si manö göi ba gulidanö. Öma sirugi ma’ökhö be’e khöma ma’ökhö andre. Ba efa’ö khöma horöma, si mane fangefa’öma sala ba zi so sala khöma. Böi ohe ndra’aga ba wanandraigö, efa’öga ba zi lõ sõkhi. Me ya’ugõ zamatõrõ banua-U, ba sokhõ fa’abõlõ, awö lakhömi, irugi zi lö aetu. Yaduhu.

12. Howuhowu:

Datatohugõ wekolida si fao fa’ohahau dõdõ, ya tobali ita sura Keriso, samaduhu’õ Ya’ia ba lala wa’aurida sero ma’õkhõ, ba ta’andrõ howuhowu Lowalangi (Muzizio ita fefu)

• Ya mufahowu’õ ita Lowalangi, Ya murorogõ ita
• Ya mufohaga mbawa-Nia khõda, Ya mu’ebua’õ dõdõ-Nia khõda
• Ya mufalemba hõrõ-Nia khõda, Ya mube’e wa’ohahau dõdõ khõda fefu. Yaduhu.

13. Manunõ: ..Duhu...Yaduhu

YA’AHOWU MBONGI WAMA’ANÖ TÖDÖ!