AGENDRE WEMAOSO YESU BA ZAHULÖ WONGI

Migu, 12 April 2020, Bözi 6 Sahulö Wongi, Nifalua ba Nomo Mbanua Niha Keriso

1. Fangowai

Sondr. Agendre Sato Sondr Sato

: : : :

Ya’ami si sambua fongambatö, owulo ita faondra ba gosali andre, awö mbanua niha Keriso sato sowulo ba nomora zamösana, börö wa’owuawua dödö, me no maoso Zo’aya ya’ita Yesu Keriso moroi ba ngai zi mate. Andrö, ba döi Yesu ma’owai ami: “No maoso Keriso”! Duhu no Maoso Keriso! Ya faofao khömi Lowalangi, Yafao khöu GehehaNia.

2. Manunõ: BZ 110: 1-2, Tasuno Yesu Si No Maoso

1	Tasuno Yesu, si no maoso, same’e khöda femöna Kurunga horö no terasa, fa’amate no te’ala. Ba fa’abölö gafökha, no oi ilaẅa So’aya.
2	Tasuno Yesu, si no maoso, si möna ba sebua töi. No Ya’ia gumbu wa’auri, Ibe’e fa’aurida göi. Da’ö gurakha zamati, sanau’ölö si lö faröi.

3. Votum

Sondr Sato

: :

Da tafohohou wa’aurida andre ma’afefu ba wa ha sambua khõ Zo’aya, muzizio ita fefu; No owulo ita ba da’e, ba dõi Lowalangi Ama, ba dõi Nono-Nia Yesu Keriso, ba ba dõi Geheha Ni’amoni’õ. Fangorifida ha ba dõi Yehowa sombõi banua si yaŵa awõ danõ. Yaduhu Mudadao zato

4. Fombaso Taroma Li Lowalangi: Sinunö 21:1-8

1	Khõ duka wanunõ andrõ. Sinunõ; khõ Dawido.
2	He Yehowa! Ba waʼabõlõmõ andrõ omuso dõdõ razo, ba owuawua sibai dõdõnia ba wanolou andrõ.
3	Somasi dõdõnia, ba no õbeʼe khõnia, ba niʼandrõ mbewenia, ba no õʼoʼõ.
4	Noa sa õfaondragõ ia, wameʼe howuhowu, awõ zi sõkhi, no õfanaembu ia saembu balaki.
5	Fangorifi no iʼandrõ khõu, ba no õbeʼe khõnia, faʼanau noso, si lõ mamalõmalõ, si lõ aetu.
6	Ebua duriania ba wanolomõ andrõ; no õʼebuaʼõ dõinia ba no õfolakhõmi ia.
7	Noa sa õfataro ia famahowu, si lõ aetu, no õʼomusoiʼõ dõdõnia tanõ fõnau.
8	Khõ Yehowa saʼae manõtõna razo, ba lõ mangiwa ia ibeʼe faʼebua dõdõ Wondrege zalawa andrõ.

5. Manunö BZ 214:1-2, Yesu No Ötehe Mate Ba Röfa

1	Yesu no Ötehe mate baröfa. Ba wolu’i fefu horö nilauma. Lö nasa aföli dödöU ndra’aga. Öbè aefa khöma fefu horöma.
2	Si tebai musu’a wa’omasi-Mö. Ödozigö niha samati khö-Mö. Niha sokhö horö, sangesa tödö. Öfolala dödö ba Ö’efa’ö.

6. Fangandrõ Wangefa Horö, Muzizio ita fefu...........

Mangandrõ ita:

He So’aya ya’aga Yesu Keriso si no mate yaŵa ba rõfa ba hili Gologata, ba si no maoso mangawuli moroi ba ngai zi mate. Mamati ndra’aga wa femaoso-Mõ andrõ zame’e khõma fa’aro dõdõ wa tesusugi ndra’aga ba luo safuria ba wanema fa’auri si lõ aetu. Heŵa’ae si manõ ba wa’aurima sero ma’õkhõ asese olifu ndra’aga wa’abõlõ wemaoso-Mõ, me arõu ndra’aga fõna-U, Mawalinga fa’aurima ba gulidanõ andre bõrõ wa’abõlõma ba fa’atuatuama samõsa, ba olifu ndra’aga wa ha sambalõ buala fa’ebua dõdõ-U. Efa’õ horõma ba bohouni wa’aurima ba wanõrõ lalama sero ma’õkhõ. He Lowalangi, hakhõsi tõdõ ndra’aga niha sebua horõ andre. Bõi faigi ndra’aga ba ngawalõ horõ ba olalõŵama, faigi ndra’aga ba wa’ahakhõ dõdõ-U ba ba wa’ebua dõdõ-U ba khõ nono-U Yesu Keriso si no tefakao ba mate, ba no Ifuli maoso ba wolohe fangorifi khõma zamõsana ya’aga samati khõ-U, Yaduhu.

Manuno: “Na ubini’õ horõgu khõ-U Yesu…..”

Na ubini’ö horögu khö Yesu, Ba lö usöndra zahono dödögu. U’ombakha’ö ngawalö horögu,

Turia wangefa horõ:

Sahakhõ tõdõ Yehowa ba sebua tõdõ; ebolo sibai dõdõnia ba no obõwõ sibai ia. Lõ nibeʼenia dali horõda ba lõ nisulõninia khõda olalõwada. Si mane faʼahakhõ dõdõ nama nononia, si manõ waʼahakhõ dõdõ Yehowa zangataʼufi yaʼia. Yaduhu.

(Mudadao zato)

7. Manunö: Buku Zinuno 261:1-3 + 6 (Te’owuloi wasömbata)

1	Ya’e zumange fasömbata. Ma’ohe sumange Yehowa. Reff: Ma’andrö khö-U fahowu’ö. Zumange ni’ohema khö-Mö
2	Ya’e zumange fasömbata mabe’e soroi ba dödöma. Reff:..................
6	Ya’e zumange fasömbata. Ma’aohasi gölö Zo’aya. Reff:..................

8. Manunö: Buku Zinunö 160:1-2, “No Owuloga Ba Döi Yesu”

1	No owuloga ba döi Yesu So’aya Lowalangima. Me no Ya’ugö zokhö fefu, ba sondrorogö ya’aga. Banua, luo, baẅa, döfi, ba ulidanö ölia. Lafaduhu’ö wangorifi, ni’a’asogö Zo’aya.
2	Börö röfa-U, Yesu So’aya, wa tola aefa horöma. No Ö’iagö salahima, ba wangatulö khö Nama. Aheta fefu mba’aba’a, si möi börö dahataha. Ya sanau ölö göi ndra’aga, irugi ba gamozua.

9. Angerõnua: Luka (Lukas) 24:1-12

1	Ba me luo migu, ba mõi ira ba lewatõ, ahulõ sibai, laʼohe zamohua andrõ, niʼasiwaira.
2	Ba laʼila, no mufagaõlõ gowe andrõ, no aheta ba lewatõ.
3	Ba me mõi ira bakha, ba lõ lasõndra mboto Yesu, Soʼaya.
4	Ba me laʼabusi tõdõ daʼõ, ba hiza niha, darua, no so ba ngaira, no mobaru safusi, sihaga.
5	Ba me ataʼu ira, ba me lafatugu ira, ba lamane khõra: Hadia wa miʼalui zauri ba zi mate?
6	Lõ yaʼia ba daʼe, noa sa maoso ia; mitõrõtõrõ tõdõmi niwaʼõnia khõmi, me so ia ba Galilaia na,
7	me itõrõ linia Nono Niha andrõ, wa lõ tola lõ tebeʼe ia ba danga niha si so horõ, awõ wa niforõfa, ia, awõ wemaosonia, na no irugi tõlu ngaluo.
8	Ba itõrõ tõdõra niwaʼõnia andrõ.
9	Ba lafuli ira, larõi lewato, laʼombakhaʼõ daʼõ fefu ba zi felezara andrõ ba ba danõ bõʼõ fefu.
10	Ira Maria, banua Magadala andrõ, ira, ba Yohane ba Maria, ina Yakobo ba awõra andrõ, laʼombakhaʼõ daʼõ ba zinenge andrõ.
11	Ba ba dõdõra, ba hulõ waya niwaʼõra andrõ, ba lõ faduhu dõdõra khõra.
12	Ba maoso Wetero, isawa lewatõ, fagohi, ba ifaõndrõ ia, ba iʼila lembe muko andrõ, no so tou, ha daʼõ, ba ifuli ia khõra, ahõlihõli dõdõnia daʼõ.

YA FADUHU DÖDÖU, NO MAOSO YESU Luka (Lukas) 24:1-12 Ba daroma li ni’erönusi ba zahulö wongi andre, oroma sibai hewisa wa’omasi awö wamosumange ndra alawe andre khö Yesu. Ohitö dödöra ba wame fanikha samohua ba mboto Zo’aya ya’ita Yesu Keriso si no mate, ena’ö alö wa’aböu ba lö ogoro niha wamaigi. Fanikha ni’ohera andre no fanikha sebua böli, si no lafa’anö. Lö khöra fa’alimagö ba wo’amualagö khö Yesu Keriso. Inönö na sa ginötö me möi ira ba lewatö, no ba zahulö wongi sibai (pagi-pagi benar [sekali]), lö lafatou. Lafahatö göi niha bö’ö sifao awöra. Ya’ita samati, imane taroma li Lowalangi, Ba balazi dõdõ zamõsana; bõi aboe dõdõ, ba tenga niforege; si no aoha gõlõ fame’e, da’õ sa zomasi Lowalangi (2Kor 9:7). Taroma li andre no sambua goigoi ba wame fasömbata. Hadia zi no tafa’anö khö Lowalangi da tabe’e khö-Nia, mendrua manö boto – noso – fa’aurida ma asambua. Ya ba da’ö tesura döida ba zisökhi simane töi ndra Maria andre, tesura ba daroma li börö gamuatara si sökhi, tenga tesura börö wolau faya. Ya’ita göi yatobali ita solohe fa’atulö, sangahatö’ö niha sifandröndröu, böi tobali ita samambambö niha ba nawönia niha mendrua manö samambambö niha khö Lowalangi. Da tafehulu dödöda wamalua si sökhi ba khö Lowalangi, ba da tafehulu dödö nawöda göi wamalua ya’ia. Me larugi lewatö ira Maria, ba tokea ira, me no tefagaölö gowe no aheta ba lewatö. Lö lasöndra mboto Yesu, abu sibai dödöra. Sindruhunia salua andrö fa’omuso dödö sebua, Yesu si no mate no ifuli auri, hizai’i börö me lö la’ila, abu dödöra. Ba ngawalö wa’abu dödö sifalukha yai’ta göi, börö me ambö wangi’ilada ba abu sibai dödöda. Ba gamaudu da’e, da tahatö’ö ita khö Lowalangi ba ta’andrö khö-Nia ena’ö ibe’e khöda wa’atuatua ba wangi’ila hadia geluaha ba hadia gohitö dödö na Itehegö abu dödöda. Na falukha ita wa’abu dödö böi taröi Zo’aya ya’ita Yesu Keriso, simane ndra alawe si möi ba lewatö, me lö faröi ira, ba tebe’e khöra wa’aboto ba dödö, tebe’e khöra wa’abölö sibohou ba fa’aro wamati. Nifa’ema mala’ika si tohare ba lewatö khö ndra Maria andre, ya’ia da’ö: 1). Yeso no auri, lö sa’ae Ya’ia ba gotalua zimate; 2) Mitörö tödö wamahaö-Nia khömi ba zi lalö, da’ö zalua, tenga si fafaya Ia. Hulö simane Yesu, maoso moroi ba ngai zi mate, ba simanö ita göi ba luo safuria. Börö da’ö angandröwada na mate ita mate ba khö Zo’aya (mati di dalam Tuhan sebagai orang benar). No ilawa wa’abölö wa’amate Yesu, no kala wa’ogömigömi. Ha Yesu zi tola molohe haga ba wa’aurida, ha Yesu zi tola ma me fa’auri khöda. Böi tafamalö tahatö’ö ita khö-Nia, ena’ö fefu wa’ogömi iheta ba wa’aurida. Böi ta’olifugö daroma li si no tarongo, tafasugisugi ba dödöda, mendrua manö tafalua ia ba wa’aurida. Faduhu dödö ndra alawe si möi ba lewatö ba li mala’ika andrö, itörö tödöra fefu wamahaö Yesu. Si no larongo, si no lai’ila ira alawe andre, ba latohugö wama’ema khö ndra nifahaö bö’ö. Lö faduhu dödö ndra nifahaö sato bap nifa’ema ndra alawe andre khöra, lawalinga solau faya. Ira nifahaö andre ba no olifu ira göi wamahaö Yesu. Lualua wa’olifura wamahaö Yesu ba labe niha solau faya. Fetero manö si möi ba lewato me no irongo moroi khö ndra Maria, ba lö na sa aboto ba dödönia hadia zalua. Moguna sibai wanöngöni daroma li Lowalangi ena’ö te’aröu’ö ita ba horö ba te’aröu’ö ita göi wamöbögö si lö duhu ba nawöda. Böi sala da ba tabe ba hulu nawöda. Böi möi ita nifaelungu, ya faduhu sindruhundruhu dödöda, No Maoso Yesu. Ba ha Ya’ia zitola mohagaini tödöda ba wa’ogömigömi börö wökhö korona. Ha Ya’ia zitola mangaefa’ö ya’ita ba wa’ate’ala ba korona.  Ha Ya’ia zi tola manolo soida Indonesia. Böi tafamalö ta’andrö ena’e fa’ahakhö dödö-Nia I’amualagö khöda, ya’ia da’ö fa’atebato wokhö korona.

Manunö: BZ 154:2, “No mafondrondrongo liU

2	Taroma li-Mö, So’aya, haga ba wa’aurima. Omasiga mafalua, tologa, Eheha. Fo’aurifa ba dödöma, da ma’o’ö ba möiga mafowua. Afu tobali fangebua, mbanua Zo’aya.

10. Tuho wamati

Me no tarongo daroma Li Lowalangi, ba da tafaogö lida wamaduhu’ö famatida ya’ita niha Keriso fõna Lowalangi, muzizio ita fefu........ endronga lida:....

Ya’o mamati khö Lowalangi Ama si lö ambö fa’abölö, somböi banua si yaẅa awö danö. Ya’o mamati khö Yesu Keriso, So’aya ya’ita, Ono Lowalangi si ha samösa, nitema nina-Nia Maria khö Geheha Ni’amoni’ö, ono nono alawe Ia, no manaögö huku Ia, barö mbawa Fondrio Filato, teforöfa Ia, mate, ba lako’o. No möi Ia ba mbanu niha tou, no maoso Ia moroi ba ngai zimate me no irugi tölu ngaluo. No manahae Ia, möi ba zorugo, dumadao ba gambölö Lowalangi Ama si lö ambö fa’abölö. I’otarai da’ö mangawuli Ia dania ba wanguhuku niha sauri, awö zi no mate. Ya’o mamati khö Geheha Ni’amoni’ö, ba ufati ha sambua mbanua ni’amoni’ö, fefu niha Keriso, fa’awösa niha ni’amoni’ö, ba fangefa horö, ba femaoso mboto zimate, ba fa’auri si lö aetu. Yaduhu.

Dumadao zato

11. Manunõ: BZ 305:1-2, “No Keriso Zangöhöli”

1	No Keriso zangöhöli, fefu soi ba gulidanö, ba wa’amate-Nia. Ba fefu wa lö mamati, awö wa’abe’e dödö, no ilaẅa So’aya, Ba Hili Gologata.
2	No Keriso zamatörö, fefu niha Ifatörö, ba wa’omasi-Nia. Ba Ya’ia zangatulö,  dozi niha oi atulö na so wamati khöra, ba daroma li-Nia.

12. Fangandrõ Salahi + Fangandrõ Zo’aya

1. Fangandrö salahi:.....................................................
2. Fangandrö Zo’aya

He Ama khöma si so ba zorugo, ya te’amoni’ö döi-U. Ya tobali banua-U fefu niha, ya itörö zomasi Ndra’ugö, hulö ba zorugo, ya si manö göi ba gulidanö. Öma sirugi ma’ökhö be’e khöma ma’ökhö andre. Ba efa’ö khöma horöma, si mane fangefa’öma sala ba zi so sala khöma. Böi ohe ndra’aga ba wanandraigö, efa’öga ba zi lõ sõkhi. Me ya’ugõ zamatõrõ banua-U, ba sokhõ fa’abõlõ, awö lakhömi, irugi zi lö aetu. Yaduhu.

13. Howuhowu:

Datatohugõ wekolida si fao fa’ohahau dõdõ, ya tobali ita sura Keriso, samaduhu’õ Ya’ia ba lala wa’aurida sero ma’õkhõ, ba ta’andrõ howuhowu Lowalangi (Muzizio ita fefu)

• Ya mufahowu’õ ita Lowalangi, Ya murorogõ ita
• Ya mufohaga mbawa-Nia khõda, Ya mu’ebua’õ dõdõ-Nia khõda
• Ya mufalemba hõrõ-Nia khõda, Ya mube’e wa’ohahau dõdõ khõda fefu. Yaduhu.

14. Manunõ: BZ 111:3, Ba Wemaoso Yesu Keriso

3	Yesu zindruhu zangefa’ö, same’e khöda femöna. Ya dozi oi humulu dödö, wangalui fangorifida. Me Ya’ia lembalembada, sanga’aro’ö tödöda. Sangila mamasao ya’ita, wondrugi naha Yehowa.

YA’AHOWU! NO MAOSO KERISO!