FAONDRAGÖ RAZO SI TOHARE ANDRÖ!

FAONDRAGÖ RAZO SI TOHARE ANDRÖ!

Yohane 12:12-19

Ira Talifusö Ni’omasi’ö ba khö Keriso,

Tasuno Zo’aya wa no tarugi mböröta Migu ba mbawa si 4 (April), hewa’ae nasa ihawui ita ba wa’abu dödö, ba wa’ata’u börö Virus Corona si no muzawili ba zi sagörö ulidanö andre. Hiza, so manö we’ao dödöda “Hawa’ara mo’ahonoa fefu da’e, So’aya?

Faudu ba ginötö si so ita andre daroma li Lowalangi tefa’ema khöda we’ao ‘Niha Sato’ si so ba Yeruzalema, yaia da’ö HOSANA, Ya’ahowu zi so andrö, ba döi Zo’aya, razo Ndraono Gizera’eli andrö ! (ay.13b). Hosana, eluahania, “tologa”, “orifiga” ba “hakhösi tödöu” – da’e we’ao ni’oguna’ö – ba Gamabu’ula Siföföna  ba wangandrö fanolo khö Lowalangi ma khö razo (fg. Sin.118:26). Ba sito’ölönia wehede andrö sifao fama’ema Wangowai ba Howuhowu: “Ya’ahowu zi so andrö, ba döi Zo’aya”. Fe’ao ‘niha sato’ andrö nitandrösaigö khö Yesu. Me so ira ba wanötöna wa Yesu andrö solohe wamohouni ba wemöna ba niha fefu. Ba Yesu andrö lafaduhu’ö sitobali Razo ba Mesia me da’ö nibalo’baloira, ya’ira soi Gizera’eli.

So’ao ‘niha sato’ andrö si so ba Yeruzalema (ay. 12) si möi ba wamalua owasa Fasa, ba sifao khö Yesu (ay.17), ya’ira: si no irai mamondrongo duria Yesu; ba si no göi mangi’ila dandra (mujizat) nifalua Yesu. Niha sato andrö omasi ira na Yesu zondröniai’ö, Razora. Nidönadönara wa Yesu andrö ifalua wamohouni ba soi Gizera’eli (secara politik).  Andro wombali’öra Yesu, Razo andrö ba lafoadu ba wanema’ö we’asonia miyomo ba Yeruzalema, ya’ia sifao dandra wasumangeta ba wemöna – me lahalö mbulu nohi ba mu’ao ira wehede “Hosana”.

Ba hiza, ba gotalua zato ba so  göi zi no faehu wo’angeraigö, yaia:

• Ndra nifaha’o Yesu (ay. 16), me lo i’anemai’ö aboto ba dödöra nifalua Yesu andrö- he we’amöi ba Yeruzalema ba si manö göi wangai-Nia Kalide andrö. Awena sa dania na tefolakhömi Yesu ba itörö tödöra ba aboto ba dödöra.
• Ndra niha Warizai’o (ay. 19), so ira ba gotalua zato me no mamagölö ira ba wora’u ba wobunu Yesu (fah. 11:53); ba me no la’ila hewisa niha sato wamaondragöra Yesu ba lö a’ozu gohitö dödöra, ba so ira ba watahisa sifao wönu.

Ira talifuso fefu ,

Ba daromali andre, tefaduhu’ö khöda  HANIHA YESU ANDRÖ. Yesu andrö ba no Ono Lowalangi, nifatenge Nama ba wolohe wangorifi ba wa’atulö ba niha khö Lowalangi. Yesu andrö, Lowalangi si tobali niha.

1. Fe’amöi-Nia ba Yeruzalema, wangoroma’ö wama’anö-Nia Ia ba wanaögö wamakao andrö si so föna-Nia. Me’i’ila wamakao andrö ba irugi ba wa’amate ba rö
2. Fohalöwö-Nia andrö ba te’oguna’ö sitobali lala wamahaö, yaia Galide andrö – me sito’ölönia gurifö andrö sololohe noro. Yesu andrö,  tohare Ia ba wamu’aini gera’era niha sato, wa ya’ia, Yesu, Mesia solohe Wa’atulo (simane nifa’ema Zakharia – fah. Zakharia 9 : 9).
3. Fangoroma’ö-Nia Ia wa Razo, sangide-gide’ö tödö (rendah hati) ba wolo’ö falo faroi khö Lowalangi irugi wa’amate-Nia ba döla röfa.

Maökhö andre migu si so ita ba no nifotöi Migu Palmarum, ba wamasugi khöda wa Keriso, So’aya, Razo si no möi ba wa’aurida, andrö börö da’ö tefarou dödöda ba wanöngöni, yaia da’ö:

Tafaondragö Yesu sifao we’ao Hosana khö Zo’aya, me ha ya’ia wanötönada sitola mangefa’ö ita ba wa’atosasa ba wamakao ba gulidanö andre, terahu ba da’ö yaia fökhö börö Virus Corona andre.

Ba ya’aboto ba dödöda sa wa fao khöda Yesu ba wamakao ba noro dödö andrö (Yesus turut menderita bersama kita saat ini). I’ondrasi ita ba wamakao andre, ba me Yaia Razo, So’aya ba Lowalangi Sabölö, Sokhö (berdaulat) ba Somböi gulidanö andre; ba ha sambalö Ibe’e wa’abölö ba Ifatörö gulidanö andre. Ena’ö tatema’ö Ia sifao wa’omuso dödö ba wanötöna böi sifao ba wa’aetu wanötöna, ba ma sifao wönu, hiza’i da tatema’ö Ia ba Wa’atulö Daroma li-Nia nirongoda ba nifa’ema’emada ba  ya’abölö ita ba wanaha wamakao andrö. Yaita nifotöi Gereja (mboto Keriso) ena’ö wangandrö dödöda si no amaedola so’ao HOSANA ba ginötö si so ita andre, ta’andrö wa’ahakhö dödö Zo’aya ena’ö alio te’aröu’ö Virus Corona  andre me so amakhaita (dampak) nia fefu ba wa’aurida niha ba gulidanö.

Tafaondragö we’aso Zo’aya ero’maökhö ba wa’aurida sifao ba wa’aboto ba dödö ba wamaduhu’ö wa Yesu Keriso andrö, Ono Lowalangi dozi samati khö-Nia ba tesöndra wa’auri si lö’aetu (fg. Yohane 20:31). Emanueli.