FAMATI SARO BA SO’AHONOA

FAMATI SARO BA SO’AHONOA

2 Fetero 1:1-9

Migu 29 Maret 2020

Ba ginötö andre, oya gameta’uö samasui fa’aurida, he fa’anumana, he famakao, he fökhö, he fangabu dödö, simate niha; ba töratöra Virus Corona si no muzawili ba zi sagörö ulidanö, tungö sanga’asogö famakao ba fa’amate. Oi ihawui ita fa’ata’u, ba manofu ita: alai na no gönado, alai na no so ba nösi nomogu, alai na so ia ba ngawalö zi no göna tangagu, alai na no so ba zi fahuwu khögu, alai na so ba nahia wohalöwögu, alai na no so ia ba nukhagu, mendrua manö na no molemba ia ba gefe nitemagu ba nibe’egu göi ba niha bö’ö?

Ba gotalua gameta’uö andrö, lö moguna ata’u ba mangiwa dödöda. Imane Taroma Li Lowalangi: “Yehowa gubalogu, lö ambö ita hadia ia… (Sin 23:1) …. He utörö mbawa danö andrö, si göna lumö wa’amate andrö, ba lö ata’udo zi lö sökhi, awögu sa ndra’ugö, si’oU andrö ba we’ewe’e  andrö khöU, da’ö wondrara dödögu (Sin 23:4)”. Simanö ba Zinunö 91:3 “I’efa’ö ndra’ugö ba dandrawa andrö khö zolau tandrawa wofo, ba I’orifi’ö ba wökhö waba famunu andrö”. Da’e we’ewe’e dödöda. Ba tatu manofu ita, ba hana’i wa fasumangeta andre tafalua ba nomo, tenga ba gosali? Hadia abölö ata’u ita khö Corona moroi khö Lowalangi? Hadia tandra wa lö mamati ? TENGA!

Aro dödöda ba tafati wa lö ambö danga Lowalangi ba wanolo, ba wangorifi ya’ita. Bahiza tatema’ö wa’ebua dödöNia andrö faoma folo’o Taroma Li-Nia. Famati andrö, moroi ba wehede Pistis (Bahasa Yunani), eluahania (1) Faduhu dödö, (2) mamaduhusi tödö wa’auri ba wamatöröNia, ba (3) Molo’ö somasi Ia. Mo’amakhaita ba Virus Corona, si no amaedola baho fa’amate, si no amaedola udu samakiko, ba ikaoni ita Taroma Li Lowalangi mangelama, simane niwa’ö ba Gamaedola 22:3 “Satuatua, ba I’ila wamakao, ba ibini’ö ia; ba sowöhöwöhö, ba latörö manö, ba te’ala.” Da’ö nifaluada andre, wa samati ba moguna atuatua ba wanörö lala wekoli me da’ö zomasi Lowalangi. Simane me falukha wamakao ndraono Gizera’eli, isuwö ira saradadu Nebukanesa, ba imane Taroma Li Lowalangi: “Ba mi’ae si bakha, ya’ami banuaGu, ba mbate’e andrö khömi, ba milazi mbawandruhö furimi! Mibini’ö ami, ha mamö’i hörö wa’ara, irege alö wönu andrö (Yesaya 26:20). Da’e nifotöi famati.

Faudu göi ba Daroma Li Lowalangi ma’ökhö, wa banua niha Keriso si föföna andrö, wa falukha ira wolohi, famunu, awö wa so zamahaö samaelungu. Udu andrö, tefo’amaedola wa Afökha andrö, hulö Zingo si ndröndöndrö, i’alu’alui haniha ni’ania (1 Fet 5:8). Hewisa ira ba da’e? Ba 1 Fet 5:7 i’o’ou zamati, imane: “Mibe’e balazi IA, na so zabu dödömi, gofu hadia ia, so so sa dödöNia ami.” Da’e ia wamati. Ba ba 2 Fet 1:1-9 ifahaö ba i’amenesi ira Fetero, ena’ö aro ba mo’ahonoa ba wamati. Awai ya’I, tesöndra wamati si ha ba mbewe, si lö buabua, ba so zamati samodombua Lowalangi, ba so wamati sambö tödö. Börö da’ö, ifahaö ira Fetero, ena’ö maulu ba wamati, ya’ia na famati andrö teforoma’ö ba lala wa’auri sero ma’ökhö. Hewisa da’ö? So 7 ngawalö zinangea oroma ba famati andrö: (1) Buabua si sökhi, (2) fa’aboto ba dödö, (3) Fanaha tödö, (4) Fa’anau gölö, (5) Fangata’ufi Lowalangi, (6) Fangomasi’ö Talifusö, ba (7) Fangomasi’ö niha fefu. Da’e wamati sifao buabua.

Andrö ba ginötö si lö sökhisökhi andre, te’amenesi ita, ena’ö aro ba mo’ahonoa ita ba wamati, soroma ba mbuabua si sökhi ba lala wa’auri sero ma’ökhö. Datae’erönusi ba tatanö ba dödöda nitanö ba dödö moroi ba  Zefania 2:3b “Fa’atulö dödö mifa’ua, ba fa lö fayawa mi’alui, ma’atö te’orifi ami na bawa wönu Yehowa andrö.” YADUHU.