FATOMESA NI’AMONI’Ö

1Korindro 11:23-32

Bongi wama’anö tödö ma asese tatötöi Kamis Putih, inötö wamasugi ba dödöda ngawalö zalua fatua lö lara’u ba laforöfa Yesu. So dombua zinangea itörö tödöda ba ginötö da’ö: 1) Bongi wemanga wasa nifalua Yesu awö nifahaö; 2) Fanasai ahe nifalua Yesu khö ndra nifahaö. So göi zame’e eraera tanö bö’ö wa ba mbongi wama’anö tödö mutörö tödö göi wangandrö nifalua Yesu ba Gezemane. Tafalua wasumangeta bongi andre ba wo’angerönusi ngawalö zalua simanö. Sadöni dödöda me ba mbongi wama’anö  tödö simane, ibe’e khöda Yesu dua faosatö goroisa-Nia, si lö tola lö ta’o’ö. Ba mbongi wemanga wasa awö nifahaö, ifa’ema Yesu goroisa ba wamalua fatomesa ni’amoni’ö. Ba wamalua fanasa ahe, ifa’ema Yesu goroisa ba wamalua fangomasi’ö awö. Andrö wa ba li Inggris, bongi wama’anö tödö lafotöi Maundy Thursday, eluahania ba li Indonesia Kamis Amanat ma Ngaluo Wame’e Oroisa. Famotöi simane, faudu na ta’angerönusi hadia geluaha zalua me luo da’ö: Ifa’ema goroisa Yesu ba nifahaö-Nia.

Fatomesa ni’amoni’ö nitemada ero na inötö, modanedane ia ba wango’ou daroma li Lowalangi: 1) Famalua owasa fasa ba niha Yahudi, nifalua eroero omo me so ira ba danö Miserayi ba wanörö tödö fangefa’ö Yehowa ya’ira moroi ba wa’amate, nidönia’ö Moze (2Moze 12:1-8, 11-14); 2) Fangoroi’ö femanga gö ni’amoni’ö nifalua Yesu khö ndra nifahaö (Matai’o 26:26-29); 3) Fangöhöndrögö geluaha wemanga gö ni’amoni’ö, roti ba agu ba watomesa ba mbanua niha Keriso ba Gorindro (1Korindro 11:23-32). Tuho nihöndrögö ya’ia da’ö, femanga wasa ba niha Yahudi no fanörö tödö ba fangaohasi ölö Lowalangi ba zahölihöli dödö si no Ifalua ba wangefa’ö banua-Nia ba wa’amate. Ba watomesa ni’amoni’ö göi, no fanörö tödö ba fangaohasi ölö Lowalangi ba wamakao nitaögö Yesu, fa’amate-Nia ba röfa ba wangefa’ö banua-Nia ba wa’amate börö horö. Börö da’ö ba gangerönuada bongi andre, ifa’ema Faulo wa moguna sibai aboto ba dödöda geluaha watomesa ba wanema roti awö agu. No ni’amoni’ö sibai ba mo’ohitö ia sitebai faefa ba lala wamatida ya’ita niha Keriso.

Moroi ba daroma li Lowalangi andre, aboto ba dödöda wa fatomesa ni’amoni’ö no oroisa Yesu Keriso khö ndra Sinenge si no falukha khö Yesu. He wa'ae fatomesa da’e alua ia ba götö silalö, ba i’ohe ita mi föna ba lala wamatida me mufulifuli mufalua ia. Ba ginötö tatema gö ni'amoni'ö ba wa'abölö daroma li Lowalangi alua wahasambua zamati ba khö Yesu Keriso. Fanörötödö wa Yesu Keriso zi no mate salahida ba ginöto ta’a roti ba tabadu agu. Eluahania tenga ha tatörö tödö Yesu Keriso ba wemanga gö ni'amoni'ö, iza’i ta’o’aurifagö ba  tatema'ö we'aso-Nia ba wa’aurida samösa. Tenga ha tatörö tödö wa'amate-Nia safönu fa'afökhö, hiza göi tatörö tödö wemaoso-Nia safönu fa'omuso dödö. Andrö wa bawanema femanga gö ni’amoni'ö tenga ni'aohasi manö me tanga femanga sito'ölö ba wangabusoi’ö, no faebua dödö ba wanema howuhowu fangefa horö ba bu’uli wanema fa'auri si lö aetu. Da’e wa’omuso dödö zamati same’e fa'ohahau dödö si tebai ibe'e niha gulidanö.

Bongi da’e tefasugi ba dödöda ba ta’omusoi’ö dödöda wasumangeta ba mbongi wamaa'anö tödö. Hana? Me tatema goroisa  Yesu wamalua fatomesa ni'amoni'ö ba oroisa-Nia ba wangomasi’ö awö. Tenga  ha nitou’ö manö dali ita na tafalua ma lö’ö. No da’e wogaonida  moroi khö Yesu ba wanema fa’ebua dödö-Nia. Na fao ita ba wanema fa’ebua dödö-Nia. Na fao ita ba wanema gö ni’amoni’ö ba no sanörö tödö  fa’omasi Zo’aya ita. Ya’ita si no manema ha sambua boto, ha sara lala wamati ba ha sambua wa’omasi. Andrö börö da’ö na ta’o’ö goroisa-Nia ba we’amöi ba watomesa ni’amoni’ö ba ta’o’ö göi goroisa-Nia ba wamalua fa’omasi ba nawö.

Fa’abölöda ba mbawa wamakiko si so ita ia da’e börö covid 19, ha fa’abölö wangefa si no ifalua Yesu si no tatema. Böi ata’u ita, i’efa’ö ita ba wa’amate si manö da’ö. Tafati ba ta’anötöna. Barö da’a göi so nifa’ema wamareta enaö böi ahatö ita ba niha, böi fara’u tanga, ta’aröu’ö ita ba zorudu ato niha, moroi ba nomo mohalöwö, moroi ba nomo tefahaö ba ba nomo talau wasumangeta khö Lowalangi. Moguna da’e enaö böi tebolosö wa’agönö dungö ba niha. Sindruhunia abua khöda wamalua me tefambambö wariawösa ba fandröndröu gamaikhatada ba niha. Ha gasagasa da’ö! Ba mbongi wama’anö tödö ia da’e, ifasugi ba dödöda wa oroisa Yesu wangomasi’ö awö ha sambalö tafalua. Hewa’ae fandröndröu mboto ba böi fandröndröu dödö. Fa’omasida ba fa’atalifusötada ba khö Zo’aya tebai iba’agö gofu hadia ia. Da tafa’anö dödöda wanema buala fa’ebua dödö-Nia ba tafa’anö dödöda göi ba wamalua fa’omasida ba nawö. Yaduhu.