AGENDRE WEMAOSO YESU BA NGALUO SI DUA

Sinaya, 13 April 2020, Bözi 10, Nifalua ba Nomo Mbanua Niha Keriso

1. Fangowai

Sondr. Agendre Sato Sondr Sato

: : : :

Ya’ami banua Zo’aya, No oi owulo ita oi faondra ba wa’owuawua dödö, me no maoso Zo’aya ya’ita Yesu Keriso moroi ba ngai zi mate. Andrö, ba döi Yesu ma’owai ami: “No maoso Keriso”! Duhu no Maoso Keriso! Ya faofao khömi Lowalangi, Yafao khöu GehehaNia.

2. Manunõ: BZ 113:1-2, No Ifuli Auri Yesu

1	No Ifuli auri Yesu, ni susugi Yehowa. Oi te’ala zaradadu, somba’agö femöna. Oi mudögö gulidanö, me möi tou mala’ika. Si möi mamokai lewatö, ba nibe’e So’aya.
2	No ifuli auri Ia, oi  tobali dödöra. No oroma mege khöra, me alele ba röfa. No Ilaẅa wa’amate, ba no möna Zo’aya. Tandra Ia si föföna, nisusugi Yehowa.

3. Votum

Sondr Sato

: :

Da tafohohou wa’aurida andre ma’afefu ba wa ha sambua khõ Zo’aya, muzizio ita fefu; No owulo ita ba da’e, ba dõi Lowalangi Ama, ba dõi Nono-Nia Yesu Keriso, ba ba dõi Geheha Ni’amoni’õ. Fangorifida ha ba dõi Yehowa sombõi banua si yaŵa awõ danõ. Yaduhu Mudadao zato

4. Fombaso Taroma Li Lowalangi: 1Razo (1Raja-raja) 17:17-24

17	Ba aefa daʼõ, ba mofõkhõ nono ndra alawe andrõ, sokhõ omo, ba tedoudou manõ wõkhõnia, irege aetu nosonia.
18	Ba imane ira alawe andrõ khõ Geliya: Hadia niwaʼõu khõgu, yaʼugõ enoni Lowalangi? Feʼamõimõ khõgu, ba enaʼõ tefasugi ba dõdõ [Lowalangi] lalõgu, ba wamunu onogu!
19	Ba imane khõnia: Da nonou! Ba ihalõ ba gaheta ninania, iʼohe yawa ba mbateʼe ba zi sagõtõ, ba nahiania andrõ, ba ibeʼe ba gasonia.
20	Ba iʼangarõfi li Yehowa, imane: He Yehowa, Lowalangigu, hadia wa no õfakao lakha mbanua andrõ, si no mõido tome, wamunu ononia?
21	Ba medõlu ifadõlõ ia yawa nono, iʼangarõfi li Yehowa, imane: He Yehowa, Lowalangigu, beʼe mangawuli noso nono matua andre!
22	Ba ifondrondrongo wangandrõ Geliya Yehowa, ba mangawuli noso nono andrõ, tobali ifuli auri.
23	Ba ihalõ nono Eliya, iʼohe tou moroi ba mbateʼe ba zi sagõtõ; iʼohe yomo ba ibeʼe khõ ninania. Imane Eliya: Hiza, no ifuli auri nonou!
24	Ba imane ira alawe andrõ khõ Geliya: Awena aboto ba dõdõgu, wa no enoni Lowalangi ndraʼugõ, awõ wa si duhu manõ daroma li Yehowa, nifaʼemamõ!

5. Manunö BZ 109:1-2, Suno Zo’aya Simaoso Moroi ba Lewatö

1	Suno Zo’aya, si maoso moroi ba lewatö. He tödögu, angalulu ba ohe zinunö. Me no möna, lö sanaha Ya’ia, ba no teala zatana.
2	Suno Zo’aya me duhu no möi salahida. Tasuno Ia tödöda  me fangefa’öda. Yesu lala, ba fa’aduhu Ia, same’e fangorifida.

6. Fangandrõ Wangefa Horö, Muzizio ita fefu...........

Mangandrõ ita:

He Ama Lowalangima si so ba zorugo, ba khõ Zo’aya ya’aga Yesu Keriso si no mate ba si no maoso moroi ba ngai zi mate ba wangorifi ya’aga. Abu sibai dõdõma ba ngawalõ horõma, ma’andrõ khõ-U be’e aefa ia khõma. Ba amualagõ khõma Geheha-U Ni’amoni’õ ena’õ mo’arota ndra’aga ba wolau si sõkhi ba arõu’õga ba zi lõ sõkhi. Abõlõ’õ ndra’aga ba wangoguna’õ inõtõ, fa’abõlõ, era’era awõ gokhõta buala-U khõma ba wamalua si sõkhi satulõ ba  si duhu, si no ifahaõ So’aya ya’aga,Yesu Keriso.  Yaduhu.

Manuno: BZ. 215: 5, “Alimagö Wa No Sarörö”

5	Ba lö tebulö wa te’ala, dozi sangerogö Ama. Si lö manehe nibohouni, tödö awö gera’era. He So’aya, heta khöma, dödö si fabu’abu’a.

Turia wangefa horõ:

Si mane fa’alawa mbanua si yawa sa, yawa danö, si manö wa’ebua dödö-Nia ba zangata’ufi Ya’ia. Si mane otaluara gatumbukha gaekhula, si manö wa’ebua gotaluada lalöda Ibe’e. Yaduhu.

(Mudadao zato)

7. Manunö: Buku Zinuno 261:1 + 6 (Te’owuloi wasömbata)

1	Ya’e zumange fasömbata. Ma’ohe sumange Yehowa. Reff: Ma’andrö khö-U fahowu’ö. Zumange ni’ohema khö-Mö
6	Ya’e zumange fasömbata. Ma’aohasi gölö Zo’aya. Reff:..................

8. Manunö: Buku Zinunö 163:1 “Uhonogö sibai dödögu….”

Uhonogö sibagi dödögu, ba wamondrondrongo li-Mö Yesu Mangalulu ndra’odo föna-U, ba gametahö-Mö iada’a Öbayoini Eheha-U Yesu, dozigö mbanua samati khö-U Ubokai dödögu khö-U Yesu, nahia daroma li-U Taroma li-Mö, lö fa’atebulö Menewi ma’ökhö, ba si’ogötö’ö, lö sa mamalö Taroma li-Mö, si möi fangabölö Utema’ö soroi ba dodo, tolo ba wolo’ö

9. Angerõnua: 1Korindro (1Korintus) 15:20-28

20	Ba iadaʼe, ba no mususugi Keriso, moroi ba ngai zi mate, no si aʼa ia ba zi no mate andrõ.
21	Me no moroi ba niha sa waʼamate andrõ, ba moroi ba niha gõi wemaoso zi mate andrõ.
22	Hulõ si mane ba khõ Gadamo sa, wa ahori mate ira ba daʼõ, si mano gõi ba khõ Keriso, ahori teʼorifi ira dania.
23	Ba oi nifõfõʼõ: Si aʼa, ba Keriso, ba fanetenia, ba tana khõ Keriso andrõ, na so ia.
24	Ba awena dania gamozua andrõ, na ibeʼe ba danga Lowalangi Ama wamatõrõ andrõ, na no iheta wamatõrõ fefu ba faʼasalawa fefu ba faʼabõlõ fefu.
25	Lõʼõ sa tola lõʼõ, salawa ia, irege no ibeʼe barõ gahenia zi faʼudu, fefu,
26	Safuria zi faʼudu, niheta, ba yaʼia waʼamate andrõ.
27	”Fefu hadia ia, ba no ibeʼe barõ gahenia.” Ba na lawaʼõ, no mubeʼe barõ mbawa fefu hadia ia, ba no taʼila, baero zameʼe barõ mbawania fefu hadia ia.
28	Ba na no mubeʼe barõ mbawania fefu hadia ia, ba awena mõi gõi Nono barõ mbawa zi no mameʼe barõ mbawania fefu hadia ia, enaʼõ ha sambalõ Lowalangi ba khõra fefu.

FEMAOSO-NIA MÖI FANUSUGIDA 1Korindro (1Korintus) 15:20-28 Banua Niha Keriso ni’omasi’õ ba dõi Zo'aya, me lõ na sa so nifotõi lozi (jam) iada’a itõrõ tõdõda na fakukuru’ua manu ba zahulo wongi, ba na moli goi riwi-riwi mefõna, sambua tanda gõi (hukum alam), ba wamaigi inõtô wemaoso ndra'amada ma ndratuada mefõna. Nano mokukuru'ua manu, ba na no moli gõi riwi-riwi, maoso ira mohalõwõ wanutu fakhe, mora'a gõ mbawi ba mondrino. Ba daromali andre, ifotuho ya'ia Femaoso-Nia (Yesu) mõi fanusugida. Hana wa mususugi ita ?, ya'ia na no mõrõ wamatida ba ginõtõ iada'a. Banua Korindro ba ginõto mefõna andrõ, oya nasa zi lõ faduhu tõdõ ba wemaoso mboto. Ba mboto andrõ tebai maoso (bangkit) bõrõ me si taunõ, safõnu hõrõ, bõrõ daõ tebai falukha ba Zamazõkhi mboto bõrõ me no niamoniõ. Dae moroi ba wamahao fõna lafotõi ( genostisisme). Ba simanõ gõi wa'aboto ba dõdõra Fa'amate ba femaoso Yesu Keriso. Irege so ira ba walõfaduhu dödö. Moroi ba wamahaõ andre ilawa da’õ Faulo me fasala ba daromali Lowalangi. Andrõ ibe'e dumaduma zalua Khõ Zo’aya ya’ita Yesu Keriso. (1Kor. 15:1-8) 1.      No'itõrõ niwaõ nia ba zura maoso Ia ba ngaluo si tõlu 2.      Ifa ila’õ Ia khõ ndra nifahaõ Nia ya'ia khõ Gefa, ba ndra nifahaõ Nia zi Felendrua 3.      Ba ba khõ Waulo samõsa - Dae sitobali fa ngombakha nia ba niha Korindo. Moroi ba daromali andre ba wemaoso Yesu Keriso, ifuli ifasugi ba dõdõda : 1.      Bua moroi ba wamati ba fa’aboto ba dõdõda wa'amate ba femaoso Yesu Keriso yaia da’õ, so wamohouni ba famalalini era’era, ba folo’õ taromali-Nia. Fefu niha la'ila labaso ba lafondrondrongo daroma-Li, ba famati, ba fa’aboto ba dõdõ Yesu Keriso lõ fefu niha la'okhõgõ. Andro ifasugi ba dõdõda ba wemaoso-Nia andre, Hadia no aboto ba dõdõda sindruhu-ndruhu Ia ma lõ'õ? Tatu nano so wa'aboto ba dõdõda, ba so wamohouni ba famalalini era’era dõdõ si lõ sõkhi ba so wolo’õ taromali-Nia ba lala wa’aurinia si’ero ma’õkhõ. "Lô fangorifi ba danõ bõ'õ ba lõ'õ gõi tõi bõ'õ ni be ba niha ba gulidanõ ba wangorifi yaita baero dõi Yesu andrõ". 2.      Ba wanõrõ tõdõ ba wa’amate ba ba wemaoso-Nia andre, ba simanõ gõi ifatõrõ’õ ba dozi samati khõnia (Ayati 16-21). Ba Ihõndrõgõ sibai gõi ba zura Yohane 11:25-26 "Imane khõnia Yesu: Yaʼodo wemaoso ba faʼauri, samati khõgu, ba auri, he w̃aʼae mate ia. Ba dozi sauri, samati khõgu, ba lõ mate, irugi zi lõ aetu. Hadia, faduhu dõdõu ba daʼõ?. Imane khõnia : E, Tua, mamati saʼae ndraʼo, wa Keriso andrõ ndraʼugõ, Ono Lowalangi, si mõi ba goeli danõ. Ba simano ba zura Roma 6:5 "Na noa saʼae fabõbõ ita khõnia, me no fakhili-khili ira waʼamateda waʼamatenia, ba si manõ sa gõi ba wemaoso dania; me aboto ba dõdõda, wa no mufarahugõ niha si tohõna khõda, wamorõfa yaʼia, enaʼõ tehõndrõgõ mboto andrõ, samazõkhi horõ, fa bõi saʼae sawuyu horõ ita." 3.      Moroi ba Wemaoso Nia teorifi ba tefolakhõmi ita dozi samati si lõ farõi (Ayati 22-28). 1Korindro 15:22-15 "Hulõ si mane ba khõ Gadamo sa, wa ahori mate ira ba daʼõ, si mano gõi ba khõ Keriso, ahori teʼorifi ira dania. Ba oi nifõfõʼõ : Si aʼa, ba Keriso, ba fanetenia, ba tána khõ Keriso andrõ, na so ia. Ba awena dania gamozua andrõ, na ibeʼe ba danga Lowalangi Ama wamatõrõ andrõ, na no iheta wamatõrõ fefoe ba faʼasalaw̃a fefoe ba faʼabõlõ fefoe. Lõʼõ sa tola lõʼõ, salaw̃a ia, irege no ibeʼe barõ gahenia zi faʼudu, fefu," Femaoso Nia no tobali femõnada, ba fanga'aro'õ wamatida ba khõ Keriso. Ba tefolakhõmi gõi dania ita bagotalua niha silõ mamati ba wanema buala fa'ahakhõ dõdõ-Nia Andrõ. Ibe khõda wa'auri zino ifabu'u khõda ba i'a'asogô khõda faauri so'ahonoa. Simanö göi nifaehago waulo ba mbanua niha keriso ba wilifi (Fil 3:20-21) "Ba si no banua ita, ba ba zorugo so; moroi ba daʼõ gõi tadõnadõna sangorifi Zoʼaya yaʼita, Yesu Keriso, samaliʼõ dania botoda, boto ba waʼideʼide andre, enaʼõ faoma ira mbotonia andrõ, solakhõmi, ba waʼabõlõ andrõ, ba niʼilania gõi ibeʼe barõ mbawania fefu hadia ia. Andrõ da ta’arõ'ö dõdõda ba wamati andrõ khõ Nia ba yamususugi wamatida si no mõrõ, tõra-tõra ba mbawa dungõ corona andre, ena’õ tabe’e we’e-we’eda Yesu Keriso andrõ si no mõna ba wolawa horõ awõ wa’abõlõ gafõkha. Ya’itolo ita Lowalangi ba wamalua taromali-Nia. Tatanö ba dödöda nitanö ba dödö moroi ba zura Yohane (Yohanes) 11:25, Imane Yesu: Ya’odo wemaoso ba fa’auri, samati khögu ba auri he wa’ae mate ia. Yaduhu.

Manunö: BZ. 154:2, “No mafondrondrongo liU

2	Taroma li-Mö, So’aya, haga ba wa’aurima. Omasiga mafalua, tologa, Eheha. Fo’aurifa ba dödöma, da ma’o’ö ba möiga mafowua. Afu tobali fangebua, mbanua Zo’aya.

10. Tuho wamati

Me no tarongo daroma Li Lowalangi, ba da tafaogö lida wamaduhu’ö famatida ya’ita niha Keriso fõna Lowalangi, muzizio ita fefu........ endronga lida:...

-          Ya’o mamati khö Lowalangi Ama si lö ambö fa’abölö, somböi banua si yaẅa awö danö. -          Ya’o mamati khö Yesu Keriso, So’aya ya’ita, Ono Lowalangi si ha samösa, nitema nina-Nia Maria khö Geheha Ni’amoni’ö, ono nono alawe Ia, no manaögö huku Ia, barö mbawa Fondrio Filato, teforöfa Ia, mate, ba lako’o. No möi Ia ba mbanu niha tou, no maoso Ia moroi ba ngai zimate me no irugi tölu ngaluo. No manahae Ia, möi ba zorugo, dumadao ba gambölö Lowalangi Ama si lö ambö fa’abölö. I’otarai da’ö mangawuli Ia dania ba wanguhuku niha sauri, awö zi no mate. -          Ya’o mamati khö Geheha Ni’amoni’ö, ba ufati ha sambua mbanua ni’amoni’ö, fefu niha Keriso, fa’awösa niha ni’amoni’ö, ba fangefa horö, ba femaoso mboto zimate, ba fa’auri si lö aetu. Yaduhu.

Dumadao zato

11. Manunõ: BZ 110:1-2, “Tasuno Yesu Si No Maoso”

1	Tasuno Yesu, si no maoso, same’e khöda femöna Kurunga horö no terasa, fa’amate no te’ala. Ba fa’abölö gafökha, no oi ilaẅa So’aya.
2	Tasuno Yesu, si no maoso, si möna ba sebua töi. No Ya’ia gumbu wa’auri, Ibe’e fa’aurida göi. Da’ö gurakha zamati, sanau’ölö si lö faröi.

12. Fangandrõ Salahi + Fangandrõ Zo’aya

1. Fangandrö salahi:.....................................................
2. Fangandrö Zo’aya

He Ama khöma si so ba zorugo, ya te’amoni’ö döi-U. Ya tobali banua-U fefu niha, ya itörö zomasi Ndra’ugö, hulö ba zorugo, ya si manö göi ba gulidanö. Öma sirugi ma’ökhö be’e khöma ma’ökhö andre. Ba efa’ö khöma horöma, si mane fangefa’öma sala ba zi so sala khöma. Böi ohe ndra’aga ba wanandraigö, efa’öga ba zi lõ sõkhi. Me ya’ugõ zamatõrõ banua-U, ba sokhõ fa’abõlõ, awö lakhömi, irugi zi lö aetu. Yaduhu.

13. Howuhowu:

Datatohugõ wekolida si fao fa’ohahau dõdõ, ya tobali ita sura Keriso, samaduhu’õ Ya’ia ba lala wa’aurida sero ma’õkhõ, ba ta’andrõ howuhowu Lowalangi (Muzizio ita fefu)

• Ya mufahowu’õ ita Lowalangi, Ya murorogõ ita
• Ya mufohaga mbawa-Nia khõda, Ya mu’ebua’õ dõdõ-Nia khõda
• Ya mufalemba hõrõ-Nia khõda, Ya mube’e wa’ohahau dõdõ khõda fefu. Yaduhu.

14. Manunõ: BZ 110:3

3	Yesu zindruhu zangefa’ö, same’e khöda femöna. Ya dozi oi humulu dödö, wangalui fangorifida. Me Ya’ia lembalembada, sanga’aro’ö tödöda. Sangila mamasao ya’ita, wondrugi naha Yehowa.

YA’AHOWU!